Formula 1 bo‘yicha 2023-yilgi mavsumning hisob bo‘yicha 8-Gran-prisi Kanadada bo‘lib o‘tdi.
Unda Red Bull poygachisi Maks Ferstappen g‘olib chiqdi. Bu niderlandiyalik poygachi uchun Gran-prilardagi ketma-ket to‘rtinchi g‘oliblik bo‘ldi. Aston Martin vakili Fernando Alonso ikkinchi o‘rinni qo‘lga kiritgan bo‘lsa, Mercedes poygachisi Lyuis Hemilton kuchli uchlikka yakun yasadi.
Ferstappen faoliyatida 41-marta Gran-pri g‘olibiga aylandi va bu borada uch karra jahon chempioni Ayrton Senna bilan tenglashib oldi. Senna va Ferstappen mazkur ko‘rsatkich bo‘yicha beshinchi o‘rinni bo‘lishib turibdi. Lyuis Hemilton (103 g‘alaba), Mixael Shumaxer (91), Sebastyan Fettel (53) va Alen Prost (51) ulardan oldinda.
2023-yilgi mavsumda ortda qolgan 8 poyganing oltitasida g‘alaba qozongan niderlandiyalik sportchi 195 ochko bilan umumiy ro‘yxatda yetakchilik qilmoqda. Uning jamoadoshi Serxio Peres (126) ikkinchi pog‘onada bormoqda. Keyingi o‘rinlarni Alonso (117) va Hemilton (102) band etgan.
2023-yilgi mavsumning ortda qolgan Gran-prilarida g‘olib bo‘lganlar bilan tanishing:
- Maks Ferstappen (Bahrayn Gran-prisi)
- Serxio Peres (Saudiya Arabistoni)
- Maks Ferstappen (Avstraliya)
- Serxio Peres (Ozarbayjon)
- Maks Ferstappen (Mayami, AQSH)
- Maks Ferstappen (Monako)
- Maks Ferstappen (Ispaniya)
- Maks Ferstappen (Kanada)
Ferstappen 2021 va 2022-yilgi mavsumlar chempioni hisoblanadi.
Izoh (0)