“Daryo”ning YouTube’dagi kanaliga xonanda Suhrob Hamdamov intervyu berdi. Xonanda hamkasbi Malika Ravshanova sabab bir kunda 15 yillik orzusi ushalgani haqida so‘zlab berdi.
— Malika Ravshanova bilan avvaldan tanishmiz. U bilan nafaqat ijodimiz, balki shaxsiy hayotimiz ham bir-biriga o‘xshaydi. U ham otasidan erta ayrilgan, yaqinlarini yo‘qotib qiyinchilikda katta bo‘lgan inson. “Bu mening onam” qo‘shig‘ini ijro etmasidan avval to‘y-xizmatlarida birga ishtirok etardik.
O‘tgan yilning avgust oyida yo‘lovchi taksilaridan foydalanib ancha qiynalib qoldim. Birinchidan ko‘p mablag‘ sarflayapman, ikkinchidan ularni kutib vaqt ketyapti, deb mashina olishga qaror qildim. Ammo jamg‘armamdagi pul mashina olishga yetmasdi. Shunda Malikaga maslahat soldim. Gapni uzoqdan olib kelib “Shu 2-3 ming dollar pul bo‘lsa, o‘zimdagi pullarni qo‘shib mashina olardim”, — dedim. Har kimning o‘z rejasi bor, Malika ham bu borada indamadi. Ammo ko‘p o‘tmay “Bir ish qilaman, inshaalloh mashina ham uy ham olasan”, — dedi. O‘sha kungi xizmatdan kichik video suratga olib, “Bu xonandaga mikrofon ham shart emas”, deb izoh yozib, ijtimoiy tarmoqqa joyladi. O‘sha kungacha ijtimoiy tarmoq nima ekanligini ham bilmasdim. Tagiga raqamlarimni ham yozib qo‘ygan ekan, ertasi kundan boshlab telefonim tinmadi. Hayajonlanib Malikaga qo‘ng‘iroq qilsam “Hali bu boshlanishi, tag‘in yulduzlik kasaliga chalinmagin”, deb ogohlantirgan edi. Hatto, reklama uchun chiroyliroq raqam olishni ham u aytgan. Men bunday narsalarga e’tibor ham bermas ekanman. Malika Ravshanova sabab, 15 yillik orzularim ushaldi, har kuni “Falon kuni bo‘shmisiz?” deb qo‘ng‘iroq qiladigan muxlislar soni ortdi.
O‘shanda Malika Ravshanova qarz bermay, bu tomondan yordam berganidan xursandman. Shu yili uy olish orzuyim ham amalga oshdi. Badiiy rahbarimiz Uchqun Tillayevning sa’y-harakatlari bilan uyga ham to‘lov qildim. Nasib qilsa, endi uyimiz ham bo‘ladi, — deydi xonanda Suhrob Hamdamov.
Izoh (0)