Braziliyalik aktrisa Luseliya Santus ishtirokidagi “Kanizak Izaura” seriali ko‘plab tomoshabinlarni ekran qarshisiga to‘play oldi va undagi qahramonlarning mashhurlikka erishishiga sabab bo‘ldi. Loyihada bosh rolni — kanizak Izaura obrazini gavdalantirgan aktrisa Luseliya Santusning taqdiri qanday kechgani esa muxlislar uchun qiziq bo‘lsa kerak.
“Kanizak Izaura” seriali 1976-yilda suratga olingan. Bu Sovet Ittifoqida namoyish etilgan birinchi xorijiy serial edi. Qizig‘i shundaki, o‘shandan beri kanizak Izaura mashhur ismga aylandi, odatda kimdir ko‘p va qattiq mehnat qilishiga to‘g‘ri kelsa, shunday deyishadi. Unda bosh rolni ijro etgan aktrisa o‘sha davrning eng mashhur aktrisalari qatoriga kiritildi, Luseliya Santus 2023-yilning 20-may sanasida 66 yoshni qarshi oldi.
Serial suratga olingan vaqtda aktrisa juda yosh bo‘lgan. Luseliya sevgan insoni bilan uzoq kutilgan baxtni topgunga qadar ko‘p sinovlardan o‘tishi kerak bo‘lgan kanizakning taqdiri haqidagi telenovellaga taklif qilinganida endigina 19 yoshga kirgan edi.
Bugungi kunda aktrisa faol hayot tarzini olib boradi. Ijtimoiy tarmoqlardagi ma’lumotlardan Luseliyaning tog‘larda sayr qilishni, plyajda dam olishni, do‘stlari bilan uchrashishini va turli xil bazmlarni yaxshi ko‘rishini bilib olish mumkin. Aktrisa buddizmga e’tiqod qiladi va yoga bilan shug‘ullanadi.
Santos siyosiy jihatdan ham faol. U prezident Luiz Inasio Lulu da Silvani qo‘llab-quvvatlaydi. Luseliya parlamentga o‘zi nomzodini qo‘ygan bo‘lsa-da, muvaffaqiyatsizlikka uchragan.
Aktrisa braziliyalik dirijyor Jon Neshling bilan turmush qurgan. Juftlikning Pedro ismli o‘g‘li bor, u aktyorlik sohasi bo‘yicha tahsil oldi. Luseliya Karolina ismli qizaloqning buvisi.
Izoh (0)