“Daryo”ning YouTube’dagi kanalida marhum aktyor Alisher Hamroyevning yaqinlari bilan suhbat tashkil etildi. Aktyorning qaynopasi bo‘lgan Guloyim Mahmudova kuyovi o‘lgach, singlisi og‘ir vaziyatga tushgani va uning o‘limoldi vasiyati haqida so‘zlab berdi.
— Singlim kuyovimizdan keyin roppa-rosa uch yil yashab, vafot etdi. Toshkentdagi onkologiya kasalxonasida davolanayotganda singlimni ko‘rish uchun keldik. “Men Alisherni tushimda ko‘rdim, qiynalishingni xohlamayman. Seni o‘zim bilan olib ketaman”, degani haqida aytdi. Uning gapidan qo‘rqib ketdik. “Tushga nimalar kirmaydi”, deb uni yupatgan bo‘ldig-u, Buxoroga qaytib ota uyimizda is chiqarib yubordik. Ammo shu voqeadan roppa-rosa o‘n kun o‘tib singlimning joni uzildi. U o‘limidan avval “Bolalarimni Toshkentda o‘qitinglar, dadasi shunday deb vasiyat qilgan”, degan gapni ko‘p aytardi. Shu bois, ishim va uyim Buxoroda bo‘lishiga qaramay, bolalarni Toshkentda o‘qitdim. Albatta, bu menga ikki hissa qiyinchilik tug‘dirdi. Shunday bo‘lsa-da, marhum kuyovim va singlimning vasiyatini bajarishim shart dedim, — deydi Guloyim Mahmudova.
Guloyim Mahmudova ota-onasidan ayrilgan Madina va Iskandar Hamroyevlarni ko‘pchilik asrab olishga uringani va nega qarindoshlar o‘rtasida nizoli vaziyat yuzaga kelgani haqida so‘zlab berdi.
— Ota-onasi vafot etganidan keyin ularni asrab olishga juda ko‘p insonlar harakat qilishdi. Buxoroning o‘zida bir nechta oilalar otamdan “Bolalarni bering, yaxshi tarbiya beramiz”, deb kelishdi. Turmush o‘rtog‘im ham vafot etganida 11–13 yoshli bolalarim bilan yolg‘iz qolganman. Avvaliga ularga men vasiy bo‘laman, demaganman. Odamlar orasida bolalarni mehribonlik uyiga topshirishdi degan mish-mishlar ham tarqaldi. Ammo biz jigarimizning farzandlarini berib yuborolmasdik. Ma’rakalar o‘tganidan keyin o‘g‘lim Madinani kiyintirish uchun Buxoro shahriga olib keldi. “Bu yer xuddi Toshkentdek, ukam ham shu yerga kelsin”, deganidan keyin Iskandarni ham olib kelganmiz. Uch-to‘rt kun yurib tursin keyin bir gap bo‘lar deganimizda, bolalarni so‘rab hech kim kelmadi. Oradan bir oy vaqt o‘tdi hamki, ota tomon qarindoshlaridan darak bo‘lmadi. Mutasaddilarga murojaat qilsam, “Yana bir oy kuting-chi”, deyishdi. Aytilgan muddatgacha hech kim kelmagach, vasiy sifatida meni belgilashdi.
Hech kimni yomon deyish niyatim yo‘q. Ammo oradan ancha vaqt o‘tib, bolalar bilan bir-birimizga o‘rganib qolganimizda, ularni olish uchun sudlashishdi. Ota-onasidan erta judo bo‘lgan bolalarni xolasidan ham ayirsak, ruhiyatiga kuchli zarba bo‘ladi deb menga qaror chiqarilganidan keyingina, sudlashish jarayonlari tugadi, — deydi Guloyim Mahmudova.
Suhbatdoshimiz bolalarga ota-onasidan qolgan meros ulushlari haligacha berilmagani va ijara uyda yashashlari haqida gapirdi.
— Kuyovim bilan singlim bir xonali uyda yashashardi. Alisher Hamroyev rahmatli o‘g‘il farzandli bo‘lganida “Ko‘payishdik, endi bizga kattaroq uy kerak”, deb singlimga ikki xonali uyning kalitini tutgan edi. Afsuski, ularning vafotidan keyin uy bilan bog‘liq nizoli vaziyatlar boshlandi. Bolalar bilan bir xonali uyda yashardik, ularning maktabi ham yaqin edi. Ammo bolalarni olib Buxoroga borib qaytib, uyga kirolmadik. Hatto, narsalarimiz ham o‘sha uyda qolib ketdi.
“Bolalar 18 yoshga to‘lsa keyin beraman, bu uy xolasiga kerak”, degan gapni ko‘p aytishdi. Mayli deb indamadim. Mana Iskandar ham 18 yoshga to‘lib qoldi, endi merosdan ulush berishar deb kutyapmiz. Chunki bolalar haligacha ijara uyda yashashadi. Bularga ham oson emas. Men ham qo‘limdan kelgancha yordam beraman, ammo Madina ko‘p xijolat bo‘ladi.
Karantin paytida yotoqxonalardan talabalarni chiqarib yuborishdi. Shunda Madina amakisiga qo‘ng‘iroq qilib “Uyning kalitini bera olasizmi? Yotoqxonadan chiqarib yuborishyapti”, deganida “Men bilmayman buvingdan so‘ra”, degan javobni olgan. Shundan keyin ko‘ngli qoldimi bilmadim, qo‘ng‘iroq qil, ko‘rgani bor desam ham unamaydi.
Bu bolalarni tarbiyalash oson kechgani yo‘q. Chunki ko‘ngli yarim, og‘ir gapirmay deb harakat qilardim. Ammo ko‘nglibo‘shlik qilsam tarbiyasi buzilib ketsa-chi, deb qo‘rqardim ham. Madina ingliz tilini yaxshi biladi IELTS dan 7,5 ball olgan. Hozirgi kunda universititetni tamomlab, xorijda magistratura bo‘yicha o‘qimoqchi. Iskandar ham xorij tillarini o‘rganyapti, u universitetning birinchi bosqichini tamomladi. Bolalardan ko‘nglim to‘q, ular yaqin orada ishlab o‘ziga sharoit qilib olishiga ko‘zim yetadi, — deydi Guloyim Mahmudova.
Izoh (0)