“Daryo”ning YouTube’dagi kanalida milliy qo‘shiqlari bilan Instagram kuzatuvchilari orasida mashhurlikka erishgan Suhrob Hamdamov bilan suhbat tashkil qilindi. U ilk marta otasidan erta ayrilgani va yaqinlari uning san’atkor bo‘lishiga jiddiy qarshilik qilishgani haqida so‘zlab berdi.
.jpg)
— Ota mehri qanday bo‘lishini ham bilmayman. Chunki otam rahmatlidan juda erta, bir yarim yoshimda ayrilganman. Otam hofiz bo‘lib, xalq xizmatidan qaytayotganda avtohalokatga uchragan ekan. Albatta, qo‘lidagi yosh bolasi bilan bu musibatni yengish onamga oson kechmagan. Onam viloyat teatrida aktrisa bo‘lib ishlardi. Turmush o‘rtog‘idan ayrilib, oilaning yolg‘iz boquvchisi bo‘lgach, meni buvimga qoldirib o‘zi ishga chiqib ketgan.
Esimni taniganimdan men buvim bilan birga edim. Buvim, xolam va onam otamning yo‘qligini bildirmaslikka harakat qilishardi. Qonda bo‘lsa, baribir san’at o‘ziga ohanrabodek tortar ekan. Bolalikdan san’atga qiziqqanman. Ammo buvim rahmatli fikrimdan qaytarish uchun rosa harakat qilgan. “Otang odamlarning to‘yini o‘tkazaman deb o‘lib ketdi, onam ham ijod bilan bo‘lib o‘zidan ortmaydi”, deb ko‘p gapirardi. Ammo “Men san’at institutiga hujjat topshiraman, o‘qishga kiray hech kimga og‘irligim tushmaydi”, deb ko‘p gapirardim. Niyatim qat’iyligini bilgach, buvim rahmatli “Aytgan o‘qishiga olib boraqol”, degan.
Onam ikkimiz Jizzaxdan kelib, hozirgi O‘zbekiston davlat san’at va madaniyat institutiga hujjat topshirganmiz. Ammo shartnoma asosida o‘qishga kirganman. Oilamizning asosiy boquvchilari ayollar bo‘lgani uchun onam “Bu yil o‘qima, kelasi yil qayta o‘qishga topshirasan”, degandi. Ammo unamaganman. Keyin bilsam uydagilar shartnoma pulini to‘lashga qiynalib, buvim rahmatli tilla uzugini uchta qo‘shniga olib chiqib ham sotolmagan ekan. Buni menga aytishmagan, ancha keyin boshqa odamlardan eshitib qolgandim. Shunday keyin o‘qishga bormay, kelasi yil qayta hujjat topshirganman. Bu gal esa omadim kelib, grant asosida o‘qishga qabul qilinganman, — deydi Suhrob Hamdamov.
Xonanda qaysi vaziyatlarda otasining yo‘qligi bilinishi va hayotda nimadan ko‘proq qo‘rqishi haqida ham to‘xtalib o‘tdi.
— Ancha yil ijara uyda yashadim. Juda qiyin vaziyatlarni boshdan kechirdim. Shunday vaziyatlarda boshimda otam bo‘lganida bunday bo‘lmasmidi, deb nolib qo‘yardim. Ammo shukrki, yorug‘ kunlar keldi. Yaratgandan hamisha qizlarim ulg‘ayib, o‘z o‘rnini topmaguniga qadar jonimni olma deb so‘rayman. Chunki o‘zim otasizlik qanday ekanligini yaxshi bilaman. Otasiz o‘sish va muhtojlikni boshdan kechirish oson emas, —deydi xonanda Suhrob Hamdamov.
Xonanda bilan bo‘lgan suhbatni quyida to‘liq tomosha qilishingiz mumkin.
Izoh (0)