“Дарё”нинг YouTube’даги каналига хонанда Суҳроб Ҳамдамов интервью берди. Хонанда ҳамкасби Малика Равшанова сабаб бир кунда 15 йиллик орзуси ушалгани ҳақида сўзлаб берди.
— Малика Равшанова билан аввалдан танишмиз. У билан нафақат ижодимиз, балки шахсий ҳаётимиз ҳам бир-бирига ўхшайди. У ҳам отасидан эрта айрилган, яқинларини йўқотиб қийинчиликда катта бўлган инсон. “Бу менинг онам” қўшиғини ижро этмасидан аввал тўй-хизматларида бирга иштирок этардик.
Ўтган йилнинг август ойида йўловчи таксиларидан фойдаланиб анча қийналиб қолдим. Биринчидан кўп маблағ сарфлаяпман, иккинчидан уларни кутиб вақт кетяпти, деб машина олишга қарор қилдим. Аммо жамғармамдаги пул машина олишга етмасди. Шунда Маликага маслаҳат солдим. Гапни узоқдан олиб келиб “Шу 2-3 минг доллар пул бўлса, ўзимдаги пулларни қўшиб машина олардим”, — дедим. Ҳар кимнинг ўз режаси бор, Малика ҳам бу борада индамади. Аммо кўп ўтмай “Бир иш қиламан, иншааллоҳ машина ҳам уй ҳам оласан”, — деди. Ўша кунги хизматдан кичик видео суратга олиб, “Бу хонандага микрофон ҳам шарт эмас”, деб изоҳ ёзиб, ижтимоий тармоққа жойлади. Ўша кунгача ижтимоий тармоқ нима эканлигини ҳам билмасдим. Тагига рақамларимни ҳам ёзиб қўйган экан, эртаси кундан бошлаб телефоним тинмади. Ҳаяжонланиб Маликага қўнғироқ қилсам “Ҳали бу бошланиши, тағин юлдузлик касалига чалинмагин”, деб огоҳлантирган эди. Ҳатто, реклама учун чиройлироқ рақам олишни ҳам у айтган. Мен бундай нарсаларга эътибор ҳам бермас эканман. Малика Равшанова сабаб, 15 йиллик орзуларим ушалди, ҳар куни “Фалон куни бўшмисиз?” деб қўнғироқ қиладиган мухлислар сони ортди.
Ўшанда Малика Равшанова қарз бермай, бу томондан ёрдам берганидан хурсандман. Шу йили уй олиш орзуйим ҳам амалга ошди. Бадиий раҳбаримиз Учқун Тиллаевнинг саъй-ҳаракатлари билан уйга ҳам тўлов қилдим. Насиб қилса, энди уйимиз ҳам бўлади, — дейди хонанда Суҳроб Ҳамдамов.
Изоҳ (0)