“Алишер Ҳамроевнинг болалари отасидан қолган уйга киритилмаяпти” — Гулойим Маҳмудова қариндошлар ўртасидаги низоли вазият судгача етиб боргани ҳақида сўзлаб берди (видео)

“Дарё”нинг YouTube’даги каналида марҳум актёр Алишер Ҳамроевнинг яқинлари билан суҳбат ташкил этилди. Актёрнинг қайнопаси бўлган Гулойим Маҳмудова куёви ўлгач, синглиси оғир вазиятга тушгани ва унинг ўлимолди васияти ҳақида сўзлаб берди.

— Синглим куёвимиздан кейин роппа-роса уч йил яшаб, вафот этди. Тошкентдаги онкология касалхонасида даволанаётганда синглимни кўриш учун келдик. “Мен Алишерни тушимда кўрдим, қийналишингни хоҳламайман. Сени ўзим билан олиб кетаман”, дегани ҳақида айтди. Унинг гапидан қўрқиб кетдик. “Тушга нималар кирмайди”, деб уни юпатган бўлдиг-у, Бухорога қайтиб ота уйимизда ис чиқариб юбордик. Аммо шу воқеадан роппа-роса ўн кун ўтиб синглимнинг жони узилди. У ўлимидан аввал “Болаларимни Тошкентда ўқитинглар, дадаси шундай деб васият қилган”, деган гапни кўп айтарди. Шу боис, ишим ва уйим Бухорода бўлишига қарамай, болаларни Тошкентда ўқитдим. Албатта, бу менга икки ҳисса қийинчилик туғдирди. Шундай бўлса-да, марҳум куёвим ва синглимнинг васиятини бажаришим шарт дедим,  —  дейди Гулойим Маҳмудова.

Гулойим Маҳмудова ота-онасидан айрилган Мадина ва Искандар Ҳамроевларни кўпчилик асраб олишга урингани ва нега қариндошлар ўртасида низоли вазият юзага келгани ҳақида сўзлаб берди.

— Ота-онаси вафот этганидан кейин уларни асраб олишга жуда кўп инсонлар ҳаракат қилишди. Бухоронинг ўзида бир нечта оилалар отамдан “Болаларни беринг, яхши тарбия берамиз”, деб келишди. Турмуш ўртоғим ҳам вафот этганида 11–13 ёшли болаларим билан ёлғиз қолганман. Аввалига уларга мен васий бўламан, демаганман. Одамлар орасида болаларни меҳрибонлик уйига топширишди деган миш-мишлар ҳам тарқалди. Аммо биз жигаримизнинг фарзандларини бериб юборолмасдик. Маъракалар ўтганидан кейин ўғлим Мадинани кийинтириш учун Бухоро шаҳрига олиб келди. “Бу ер худди Тошкентдек, укам ҳам шу ерга келсин”, деганидан кейин Искандарни ҳам олиб келганмиз. Уч-тўрт кун юриб турсин кейин бир гап бўлар деганимизда, болаларни сўраб ҳеч ким келмади. Орадан бир ой вақт ўтди ҳамки, ота томон қариндошларидан дарак бўлмади. Мутасаддиларга мурожаат қилсам, “Яна бир ой кутинг-чи”, дейишди. Айтилган муддатгача ҳеч ким келмагач, васий сифатида мени белгилашди.
Ҳеч кимни ёмон дейиш ниятим йўқ. Аммо орадан анча вақт ўтиб, болалар билан бир-биримизга ўрганиб қолганимизда, уларни олиш учун судлашишди. Ота-онасидан эрта жудо бўлган болаларни холасидан ҳам айирсак, руҳиятига кучли зарба бўлади деб менга қарор чиқарилганидан кейингина, судлашиш жараёнлари тугади, — дейди Гулойим Маҳмудова.

Суҳбатдошимиз болаларга ота-онасидан қолган мерос улушлари ҳалигача берилмагани ва ижара уйда яшашлари ҳақида гапирди.

— Куёвим билан синглим бир хонали уйда яшашарди. Алишер Ҳамроев раҳматли ўғил фарзандли бўлганида “Кўпайишдик, энди бизга каттароқ уй керак”, деб синглимга икки хонали уйнинг калитини тутган эди. Афсуски, уларнинг вафотидан кейин уй билан боғлиқ низоли вазиятлар бошланди. Болалар билан бир хонали уйда яшардик, уларнинг мактаби ҳам яқин эди. Аммо болаларни олиб Бухорога бориб қайтиб, уйга киролмадик. Ҳатто, нарсаларимиз ҳам ўша уйда қолиб кетди. 
“Болалар 18 ёшга тўлса кейин бераман, бу уй холасига керак”, деган гапни кўп айтишди. Майли деб индамадим. Мана Искандар ҳам 18 ёшга тўлиб қолди, энди меросдан улуш беришар деб кутяпмиз. Чунки болалар ҳалигача ижара уйда яшашади. Буларга ҳам осон эмас. Мен ҳам қўлимдан келганча ёрдам бераман, аммо Мадина кўп хижолат бўлади.
Карантин пайтида ётоқхоналардан талабаларни чиқариб юборишди. Шунда Мадина амакисига қўнғироқ қилиб “Уйнинг калитини бера оласизми? Ётоқхонадан чиқариб юборишяпти”, деганида “Мен билмайман бувингдан сўра”, деган жавобни олган. Шундан кейин кўнгли қолдими билмадим, қўнғироқ қил, кўргани бор десам ҳам унамайди. 
Бу болаларни тарбиялаш осон кечгани йўқ. Чунки кўнгли ярим, оғир гапирмай деб ҳаракат қилардим. Аммо кўнглибўшлик қилсам тарбияси бузилиб кетса-чи, деб қўрқардим ҳам. Мадина инглиз тилини яхши билади IELTS дан 7,5 балл олган. Ҳозирги кунда университитетни тамомлаб, хорижда магистратура бўйича ўқимоқчи. Искандар ҳам хориж тилларини ўрганяпти, у университетнинг биринчи босқичини тамомлади. Болалардан кўнглим тўқ, улар яқин орада ишлаб ўзига шароит қилиб олишига кўзим етади, — дейди Гулойим Маҳмудова.