O‘rta yosh vakillari aktyor Alisher Hamroyevni yaxshi tanishadi. "Dilxiroj", "Notanish polvon", "Marjona", "Yodgor" kabi filmlardagi rollari bilan muxlislar e’tiboriga tushgan aktyor 1976-yilning 2-yanvar sanasida Buxoro viloyatining Kogon shahrida tug‘ilgan.
U yoshligidan san’atga qiziqqani bois maktabni tamomlab, Toshkentga kelgan hamda O‘zbekiston davlat san’at va madaniyat oliygohiga o‘qishga kirib, drama va kino aktyorligi bo‘limida tahsil olgan. Oliygohni tamomlagach, aktyorlik faoliyatini O‘zbek Milliy akademik drama teatrida boshlagan. Ushbu teatrda ishlash davomida u, o‘nlab spektakllarda ishtirok etgan.
Aktyor 2005-yil 29 yoshida olamdan o‘tgan. Alisher Hamroyevning yaqinlari “Daryo”ga bergan intervyusida aktyor va uning rafiqasining vafot etish sababi haqida gapirib berdi.
“Singlim onkologiya kasalliklari shifoxonasida yotganida Alisherni tushimda ko‘rdim’ degan”
“Aslida kuyovimiz 2004-yilda kasal bo‘lgan va 2005-yilda oyog‘idan saratonga chalinganligi sababli vafot etgan. Singlim esa bu holatdan stressga tushib qolgan, oradan uch yil o‘tib u ham vafot etdi. Ikki nafar farzandi bilan Toshkentga kelgan edi, qiynalgan, sababi ulardan hech kim xabar olmagan. Vaqt o‘tib oqqon kasalligiga chalingan, keyin yana bolalarini olib Buxoroga ketgan.
Yana qaytib Toshkentga olib kelganimizdan keyin 10 kun davolanib shu yerda vafot etdi. Bolalari Buxoroda edi, dadamning uyiga olib borib o‘sha yerdan chiqarganmiz. Singlim onkologiya kasalliklari shifoxonasida yotganida Alisherni tushimda ko‘rdim, u menga seni qiynalishingni xohlamayman, o‘zim bilan olib ketaman deb aytdi. Biz hayron qoldik, singlim bilan uyga borib “is” chiqardik. Unga hammasi yaxshi bo‘ladi, tushga nimalar kirmaydi, dedik. Biroq oradan 10 kun o‘tib vafot etdi”, — deydi Guloyim Mahmudova.
“Dadam ishtirok etgan filmlar ularni eslatib turadi”
“Dadam vafot etganida taxminan ikki-uch yosh bo‘lganman. Ular bilan bog‘liq jonli xotiralarim kam. Dadamni faqat aktyor sifatida bilganman. Ular bilan bog‘liq xotiralarim bo‘lmasa ham, miyamda shuni gavdalantirganman. Dadam ishtirok etgan filmlar ularni eslatib turadi. Nechta inson bilan gaplashgan bo‘lsam, dadang zo‘r inson edi, deb aytishgan. Hech qachon ular haqida yomon gap eshitmaganman, har doim ijobiy fikrlarni eshitib kelganman”, — deydi aktyorning qizi Madina Hamroyeva.
“Dadangdagi aktyorlik qobiliyati sening qoningda bor, deyishardi”
“Maktabdagi tadbirlarda ishtirok etgan vaqtim o‘qituvchim menga asosiy rollarni berardi. Sahna ko‘rinishi bo‘lsa Alisher Navoiy yoki Husayn Boyqaroning dialoglarini gapirtirardi. Nimaga unday qilishayotganini so‘rasam, sen rollarni yaxshi chiqarib berishing kerak, chunki dadangdagi aktyorlik qobiliyati sening qoningda bor, deyishardi. Shu narsa mas’uliyatni qabul qilishimga yordam bergan.
Turli xil narsalarni sinab ko‘rish men uchun qiziq bo‘lgan. Meni xolam tarbiya qilgan, muloqotga tez kirisha olmayman. Sababi xolam bo‘sh vaqtimni boshqalar bilan o‘tkazishimga qarshilik qilardi. Ular ko‘p o‘qishimni, o‘z ustimda ishlashim kerakligini aytardi”, — deydi
Aktyorning yaqinlari bilan bo‘lgan suhbatni quyida to‘liq tomosha qilishingiz mumkin.
Izoh (0)