Mashhur aktrisa va xonanda Jennifer Lopesning yosh ko‘rinish sirlari ko‘plab muxlislar uchun qiziq. Quyida uning yosh ko‘rinishi va go‘zallik sirlari haqida ma’lumot beriladi.
Jennifer Lopes amerikalik aktrisa, qo‘shiqchi, raqqosa, prodyuser va model. U 1969-yilda Nyu-Yorkda tug‘ilgan va o‘z faoliyatini musiqiy videolar va teleko‘rsatuvlarda raqqosa sifatida boshlagan. Vaqt o‘tib Jennifer Lopes dunyodagi eng mashhur insonlardan biriga aylandi.
Jennifer Lopes sog‘lom turmush tarzining kaliti — sport, uyqu, to‘g‘ri ovqatlanish ekanligini aytgan.
Aktrisa bolaligidan sportni, ya’ni gimnastika va softbolni yaxshi ko‘rardi. U bugungi kunda ham sog‘lom va jozibadorligini saqlashga yordam beradigan odatlariga amal qilishda davom etmoqda.
Doimiy jismoniy faollik va nafas mashqlari
Lopes ertalabki yugurish, yoga darsi va 20 daqiqalik meditatsiyani kun tartibiga kirgizgan. Uning fitnes dasturi muntazam kardio, raqs va vazn mashqlarini o‘z ichiga oladi. Bundan tashqari, Jennifer dam olishga, tashvish va bezovta fikrlardan xalos bo‘lishga yordam beradigan nafas olish amaliyotlarini yaxshi ko‘radi. Uyqu ham aktrisaning hayotida muhim rol o‘ynaydi va u band bo‘lishiga qaramay, doimo to‘liq dam olishga vaqt topadi.
Parhez va ertaroq kechki ovqat
Aktrisa qomatini saqlab qolish uchun parhezini kuzatib boradi. Tonggi meva qo‘shilgan kokteyl bilan boshlaydi, tushlikda oqsilga boy ovqatlarni afzal ko‘radi: tovuq yoki baliqni guruch va loviya bilan aralashtirib iste’mol qiladi, kechki ovqatda esa o‘simlik oqsiliga boy oziq-ovqatlarni sabzavot bilan qo‘shib yeydi va kechki ovqatni 18:30 dan oldin tanovul qilishga harakat qiladi.
Terini tozalash va himoya qilish
Terini tozalash, namlash va quyoshdan himoyalovchi vositalardan foydalanish Jenniferning kundalik yuzni parvarish qilishiga asoslangan uchta asosiy qoidasi hisoblanadi. U uydan chiqishni rejalashtirmagan bo‘lsa ham, hech qachon bu ishlarni qilishni unutmaydi.
Aktrisa terini namlash va nozik ajinlarni tekislash uchun zaytun kompleksli sivorotkaga murojaat qiladi. U bu vositani yuzi, bo‘yni va hatto quloqlariga surtadi. Jennifer Lopes sochini parvarish qilishda ko‘pincha kokos moyidan foydalanadi, bu esa sochlarini mukammal namlashga yordam beradi.
Sizni yanada chiroyli ko‘rsatadigan makiyaj
Jennifer Lopes ko‘zlariga jigarrang va kulrang tenni surtishni afzal ko‘radi. Shu bilan birga lablariga tabiiyroq rangdagi lab bo‘yog‘ini surtadi. Agar aktrisa lablariga yorqinroq rangdagi lab bo‘yog‘ini surtsa, ko‘zlarini to‘q rangdagi ten bilan bo‘yaydi. Aktrisa ko‘zlarini oq yoki marvarid rangidagi qalam bilan bo‘yashni yaxshi ko‘radi.
Jennifer Lopes har qanday makiyajda o‘zining terisiga shaftoli rangidagi rumyana surtishni yaxshi ko‘radi, bu esa uning yuziga yangi, sog‘lom va yorqin ko‘rinish beradi.
Jennifer Lopes agar inson baxtsiz bo‘lsa, hech qanday makiyaj buni yashira olmasligini aytgan. Makiyaj qanchalik chiroyli bo‘lishidan qat’i nazar, insonlar bari bir siz his qilgan narsani ko‘radi. Shuning uchun, kosmetikadan yuzingizni yashirish uchun emas, chiroyli ko‘rishingizni ta’kidlash uchun foydalanish kerak.
Kiyinish uslubi
Jennifer Lopes ko‘pincha kalta topiklar, mini-ko‘ylaklar, tor jinsilar kiyishni ma’qul ko‘radi. Biroq, agar siz aktrisa uslubining evolyutsiyasini tahlil qilsangiz, u asta-sekin qanday o‘zgarganini ko‘rishingiz mumkin.
Masalan, 2000-yillarning boshlarida Jennifer Lopesning kiyinish uslubi umuman boshqacha edi: u bo‘yinbog‘ taqqan, sport-shik uslubidagi liboslarni va tor ko‘ylaklarni kiygan. Vaqt o‘tib aktrisaning uslubi yanada klassik va yaxshi ko‘rinishga ega bo‘ldi. U ko‘proq klassik uslublar va kombinatsiyalarni tanladi, biroq shu bilan birga o‘zining obrazini saqlab qoldi.
Jennifer uning didiga voyaga yetgan joyi ta’sir qilganini aytgan.
“Ha, men Bronksdanman va hali ham bilaguzuklar va katta halqalar taqishni yaxshi ko‘raman”, — deydi aktrisa.
Aktrisaning shaxsiy xislatlari
Jennifer Lopes o‘zining irodali va qat’iyatliligi bilan mashhur. U agar chindan ham xohlasangiz va imkon qadar ko‘proq harakat qilsangiz, hamma ishning uddasidan chiqish mumkinligiga ishonadi. Xonandaning ruhi og‘ir damlarda ham sinmaydi, u nima bo‘lishidan qat’i nazar, o‘z maqsadlari sari borishda davom etadi.
Jennifer o‘zini raqqosa sifatida sinab ko‘rgan paytlarda ko‘pchilik unga hech narsaga erisha olmasligini, hech qachon muvaffaqiyat qozonmasligini aytgan. Biroq u bu so‘zlarni qanchalik ko‘p eshitgan bo‘lsa ham, maqsadiga erisha olishini tushunib yetdi.
“Men baxtni tashqaridan topaman, uni menga boshqa inson berishi mumkin, deb o‘ylagandim. Keyin bunday emasligini angladim. Agar siz o‘zingizni qadrlasangiz va qadringizni tushunib yetsangiz, eng baxtli insonga aylanasiz”, — deydi Jennifer Lopes.
Izoh (0)