“Biz haqiqatan ham aka-ukalardekmiz”. Tom Holland, Tobi Maguayr va Endryu Garfild bilan yashirincha gaplashib turishi haqida

“O‘rgimchak odam” filmi muxlislari ushbu qahramon uch aktyor tomonidan gavdalantirilganini yaxshi biladi. Ma’lum bo‘lishicha, Tom Holland, Endryu Garfild va Tobi Maguayr yashirincha suhbatlashib turadi.

“O‘rgimchak odam” rolini gavdalantirgan aktyor Tom Holland yaqinda bergan intervyularining birida loyihaning so‘nggi qismi chiqqandan buyon Tobi Maguayr va Endryu Garfild bilan yaqin aloqada ekanini aytdi.

“Ushbu noyob sayohatni birgalikda bosib o‘tdik va ajoyib rishtalarni yaratdik. Biz haqiqatan ham aka-ukalardekmiz. Vaqti-vaqti bilan suhbatlashadigan chatimiz bor, u ‘O‘rgimchak bolalar’ deb nomlanadi”, — deydi aktyor.

Ma’lum bo‘lishicha, ularning oxirgi suhbati Tom Hollandning Londonda o‘tkazilgan The Brothers Trust xayriya tadbiridagi ishtiroki bo‘lgan. U hamkasblaridan kim oshdi savdosida sotiladigan bir nechta plakatlarga imzo chekishni so‘ragan.

“Ular menga yordam berganidan xursand edi”, — deydi Tom Holland.

Bundan tashqari, Tom maslahat olish uchun Benedikt Kemberbetchga murojaat qiladi, sababi u aktyor bilan qo‘shni.