Jizzax viloyatidagi harbiy qismlarning birida xizmat o‘tayotgan 18 yoshli yigit vafot etdi. Bu haqda jamoatchilikka xabar bergan “Kun.uz” nashrining aniqlik kiritishicha, vafot etgan yigit Milliy gvardiya tasarrufidagi harbiy qismlardan birida xizmat o‘tayotgan yangiyo‘llik Otabek Tursunaliyev bo‘lgan.
Mazkur xabarga munosabat bildirgan Milliy gvardiya axborot xizmati oddiy askar o‘limiga o‘tkir yurak qon-tomir yetishmovchiligi sabab bo‘lganini maʼlum qilgan.
Qayd etilishicha, Milliy gvardiyaning Jizzax viloyati bo‘yicha boshqarmasida muddatli harbiy xizmatni o‘tayotgan oddiy askar Otabek Tursunaliyev 6-iyun kuni tibbiyot bo‘limi feldsheriga oshqozonida og‘riq borligini aytib, murojaat qilgan.
“7-iyun kuni askar boshqarma tibbiyot bo‘limi boshlig‘i tomonidan Samarqand harbiy gospitaliga olib borilib, tibbiy ko‘rikdan o‘tkazilgan. Mutaxassis-terapevt vrach askarga ‘Surunkali gastroduodinit qo‘zish davri’ tashxisini qo‘ygan. Hamda terapiya bo‘limiga statsionar davolanish uchun yotqizilgan. 15-iyun kuni soat 14:00 da askarning sog‘lig‘i yomonlashib, harbiy gospitalda vafot etgan”, — deyiladi Milliy gvardiya axborot xizmati xabarida.
Milliy gvardiya qo‘mondonligi va shaxsiy tarkib marhumning bevaqt vafoti munosabati bilan yaqinlariga chuqur taʼziya izhor qilib, mazkur holat bo‘yicha Samarqand viloyati Harbiy prokuraturasi tomonidan tergovga qadar tekshiruv ishlari olib borilayotganini ochiqlagan.
Oddiy askar o‘limi haqida jamoatchilikni boxabar qilgan nashrning qo‘shimcha qilishicha, askar o‘limi haqidagi maʼlumotnomada keltirilgan vajlar Otabek Tursunaliyevning yaqinlarini ishontirolmayapti.
Avvalroq, Surxondaryo viloyatining Termiz shahridagi harbiy qismlarning birida xizmat qilayotgan askar yigit Kamoliddin Qodirov vafot etgani, marhumning yaqinlari murdada tig‘ izlari borligini aytgani xabar berilgandi. Bunga munosabat bildirgan Mudofaa vazirligi masʼullari esa jasaddagi tig‘ izlari operatsiya davomida orttirilgan jarohat izlari ekanini bildirgandi.
Izoh (0)