Surxondaryo viloyati Uzun tumanidagi maktabda ikki ayol o‘qituvchi erkak hamkasbi tomonidan kaltaklangani haqida xabar berilgan edi. Oliy sud matbuot xizmatining ma‘lum qilishicha, mazkur erkakka sud hukmi o‘qildi.
Unga ko‘ra, 16-iyun kuni jinoyat ishlari bo‘yicha Uzun tuman sudida G.T. (1988-yilda Surxondaryo viloyatining Sariosiyo tumanida tug‘ilgan, 31-sonli maktabning jismoniy tarbiya o‘qituvchisi bo‘lib ishlagan)ga oid jinoyat ishini ko‘rib chiqish bo‘yicha ochiq sud jarayoni tugab, sud hukmi eʼlon qilindi.
Eʼlon qilingan hukmga ko‘ra, G.T. Jinoyat kodeksining 277-moddasi (bezorilik) 3-qismi “g” bandi bilan aybli deb topilib, jinoyat oqibatida ikki nafar jabrlanuvchiga yetkazilgan maʼnaviy va moddiy zararlar qoplanganligi hamda ularning sudlanuvchiga nisbatan daʼvosi yo‘qligi inobatga olingan holda unga 1 yil 6 oy muddatga ozodlikdan mahrum qilish jazosi tayinlandi. Tayinlangan jazoni manzil-koloniyalarda o‘tash belgilandi.
Ushbu qarordan norozi taraflar qonunda belgilangan tartib va muddatda Surxondaryo viloyat sudining apellyatsiya instansiyasiga shikoyat berish va protest keltirishga haqliligi aytildi.
Maʼlum qilinishicha, voqeadan bir kun avval shu maktabda ota-onalar yig‘ilishi bo‘lib o‘tgan. Unda ota-onalarning biri tomonidan o‘qituvchilarning maʼnaviy buzuqligi haqida so‘z borgan. Isbot tariqasida o‘zida video borligini ham aytgan. Shundan so‘ng ayol o‘qituvchilar yig‘ilib direktorga aytish maqsadida majlis qilgan. Ota-onalar tomonidan aytilgan videoni o‘ziga tegishli deb tushungan erkak o‘qituvchi kelib majlisga aralashgan va shu orada janjal sodir bo‘lgan.
“Ayollar yig‘ilishi bo‘lyapti, dedim. Keyin menga birdan qarab, sensirab, ‘Sening nima ishing bor, men o‘zim bilaman’, dedi-da o‘zi shahd bilan ustimga keldi. Uni uradi, deb kutmagandim. Tizzasi bilan biqinimga tepdi, keyin sherigim joyidan turib, gapirmasligimni iltimos qildi. U esa bizni tinimsiz so‘kdi. Tinimsiz so‘kkani sababli men yana gapirdim”, — deydi jabrlanuvchi ayol.
Mazkur ayol davolanayotgan shifoxona xodimining so‘zlariga ko‘ra, hozirda uning ahvoli stabil holatda.
“Bemor bizga bosh og‘rig‘i, ko‘krak qafasi o‘ng taraf biqin sohasidagi og‘riqdan shikoyat qilib kelgan. Hozirgi kunda barcha tekshiruvlarni o‘tkazganmiz. Uning ahvoli hozirda stabil”, — deydi shifokor.
Izoh (0)