Жиззах вилоятидаги ҳарбий қисмларнинг бирида хизмат ўтаётган 18 ёшли йигит вафот этди. Бу ҳақда жамоатчиликка хабар берган “Kun.uz” нашрининг аниқлик киритишича, вафот этган йигит Миллий гвардия тасарруфидаги ҳарбий қисмлардан бирида хизмат ўтаётган янгийўллик Отабек Турсуналиев бўлган.
Мазкур хабарга муносабат билдирган Миллий гвардия ахборот хизмати оддий аскар ўлимига ўткир юрак қон-томир етишмовчилиги сабаб бўлганини маълум қилган.
Қайд этилишича, Миллий гвардиянинг Жиззах вилояти бўйича бошқармасида муддатли ҳарбий хизматни ўтаётган оддий аскар Отабек Турсуналиев 6 июнь куни тиббиёт бўлими фелдшерига ошқозонида оғриқ борлигини айтиб, мурожаат қилган.
“7 июнь куни аскар бошқарма тиббиёт бўлими бошлиғи томонидан Самарқанд ҳарбий госпиталига олиб борилиб, тиббий кўрикдан ўтказилган. Мутахассис-терапевт врач аскарга ‘Сурункали гастродуодинит қўзиш даври’ ташхисини қўйган. Ҳамда терапия бўлимига стационар даволаниш учун ётқизилган. 15 июнь куни соат 14:00 да аскарнинг соғлиғи ёмонлашиб, ҳарбий госпиталда вафот этган”, — дейилади Миллий гвардия ахборот хизмати хабарида.
Миллий гвардия қўмондонлиги ва шахсий таркиб марҳумнинг бевақт вафоти муносабати билан яқинларига чуқур таъзия изҳор қилиб, мазкур ҳолат бўйича Самарқанд вилояти Ҳарбий прокуратураси томонидан терговга қадар текширув ишлари олиб борилаётганини очиқлаган.
Оддий аскар ўлими ҳақида жамоатчиликни бохабар қилган нашрнинг қўшимча қилишича, аскар ўлими ҳақидаги маълумотномада келтирилган важлар Отабек Турсуналиевнинг яқинларини ишонтиролмаяпти.
Аввалроқ, Сурхондарё вилоятининг Термиз шаҳридаги ҳарбий қисмларнинг бирида хизмат қилаётган аскар йигит Камолиддин Қодиров вафот этгани, марҳумнинг яқинлари мурдада тиғ излари борлигини айтгани хабар берилганди. Бунга муносабат билдирган Мудофаа вазирлиги масъуллари эса жасаддаги тиғ излари операция давомида орттирилган жароҳат излари эканини билдирганди.
Изоҳ (0)