“43 tasi o‘ldirilgan, 20 tasi tutqunlikda ushlab turilgan”. Qashqadaryoda echkiemar kushandasi tabiatga 311 million so‘m zarar keltirgani ma’lum bo‘ldi

Qashqadaryo viloyat Ekologiya, atrof muhitni muhofaza qilish va iqlim o‘zgarishi boshqarmasi “Qizil kitob”ga kiritilgan echkiemarlarga qirg‘in keltirayotgan brokonyer qilmishini fosh qildi. Bu haqda “Daryo”ga boshqarma axborot xizmati rahbari Karima Yodgorova xabar berdi.

Maʼlum bo‘lishicha, viloyat Ekologiya, atrof-muhitni muhofaza qilish va iqlim o‘zgarishi boshqarmasi hamda IIB xodimlari hamkorligida 2023-yil 14-iyun kuni Kasbi tumanida brokonyerlikka qarshi kurashish maqsadida nazorat tadbiri o‘tkazilgan.

“Nazorat tadbirida ‘Kasbi’ MFY, Obod mahalla ko‘chasida yashovchi fuqaro M.I. yashash xonadonida O‘zbekiston Respublikasi ‘Qizil kitob‘i hamda CITEС Konvensiyasining ilovasiga kiritilgan bo‘z echkiemarlarni tutqunlikda saqlab, ularni vahshiylarcha nobud qilayotgani aniqlandi”, — deyiladi boshqarma axborotida.

Tezkor tadbirda 20 ta echkiemarning tutqunlikda saqlanayotgani, 43 ta echkiemar esa o‘ldirilib, terisi shilib olingani maʼlum bo‘lgan.

“Mazkur holat bo‘yicha tegishli tartibda hujjatlar rasmiylashtirilib, fuqarodan 20 ta tirik echkiemar va 43 ta echkiemar terisi ashyoviy dalil sifatida olib qo‘yildi. Tirik bo‘lgan 20 ta bo‘z echkiemar o‘zining yashash muhiti bo‘lgan Muborak tumanidagi cho‘l hududlariga qo‘yib yuborildi”, — deydi boshqarma axborot xizmati rahbari Karima Yodgorova.

Qo‘shimcha qilinishicha, holat bo‘yicha O‘zbekiston Respublikasi “Ekologik nazorat to‘g‘risida”gi qonunining 25-moddasi, “Tabiatni muhofaza qilish to‘g‘risida”gi qonunning 47-, 49- va 50-moddalari, “Hayvonot dunyosini muhofaza qilish va undan foydalanish to‘g‘risida”gi qonunining 51- va 53-moddalari, Jinoyat kodeksining 202-moddasi, shuningdek, Vazirlar Mahkamasining 2014-yil 20-oktabrdagi qarorida tasdiqlangan “Hayvonot dunyosi obyektlaridan foydalanish va hayvonot dunyosi obyektlaridan foydalanish sohasida ruxsat berish tartib-taomillaridan o‘tish tartibi to‘g‘risida”gi nizomga asosan huquqbuzarga hayvonot dunyosiga yetkazilgan jami 311 million 850 ming so‘m zarar hisoblanib, rasmiylashtirilgan hujjatlar prokuraturaga taqdim etilgan.