Termiz shahridagi harbiy qismlarning birida xizmat qilgan 18 yoshli askar jasadidagi tig‘ izlari operatsiya davomida orttirilgan jarohat izlari ekani aytildi. Bu haqda Mudofaa vazirligining tibbiy ta’minot boshqarmasi boshlig‘i Bahodir Abdulahatov AOKAda bo‘lib o‘tgan matbuot anjumanida ma’lum qildi.
Jarrohlik amaliyotidan so‘ng ko‘krak qafasini drenajlash bo‘ladi. Marhumning yaqinlari aytayotgan o‘sha tig‘ni drenaj qo‘ygan bo‘ladi. Ko‘krak qafasini teshib, qovurg‘alar orasiga to‘rt-beshta drenaj qo‘yiladi. Operatsiyadan so‘ng qon ketib qoladigan bo‘lsa, biz uni nazorat qilishimiz kerak bo‘ladi-da. To‘satdan o‘lim holatlari yoki asoratlarining oldini olishimiz uchun bu — drenajlash kerak bo‘ladi. Marhumning yaqinlari aytayotgan tig‘ mana shu. Marhum aynan shu tig‘lar asosida vafot etdi deyish noto‘g‘ri, — dedi Bahodir Abdulahatov.Mas’ulning ma’lumot berishicha, vazirlik operatsiya jarayoni va drenajlash aks etgan videolavhalarni marhumning yaqinlariga taqdim qilgan.
Marhum askarning badanidagi tig‘ deyilayotgan izlar qanday hosil bo‘lganini isbotlovchi videolarni marhumning ota-onasiga berganmiz. Bunga kim qiziqsa, tashlab beraman, — deydi vazirlik mas’uli.Matbuot anjumanida shuningdek, bolaning ahvoli og‘irlashgach, nega faqat tog‘asi va onasi chaqirilganiga, otasi chaqirilmaganiga ham oydinlik kiritildi.
Bolaning o‘zi ham operatsiyadan oldin uni qaramog‘iga olgan tog‘asiga telefon qilib, o‘zi tog‘asini chaqirgan. Shuningdek, bizga onasi va tog‘asining nomerlarini bergani uchun biz ham askar yigit bergan telefon raqamlariga qo‘ng‘iroq qilib, uning yaqinlarini vaziyatdan boxabar qilganmiz. Ota-onasining bir-biri bilan qanday munosabatda ekanligi bizga qorong‘i, — deydi Bahodir Abdulahatov.Askar yigitda o‘limidan ikki oy ilgari shamollash belgilari bo‘lgani qo‘shimcha qilindi.
Onasi va tog‘asining aytishicha, yigitda o‘limidan ikki oy ilgari shamollash holatlari bo‘lgan. Qolaversa, yo‘tali bo‘lgani uchun tibbiyot punktida davolanib yurgan. Ahvoli yaxshilanavermagach, Termiz harbiy gospitaliga olib borilgan. Va aynan shu yerda uning ko‘krak qafasida suyuqlik aniqlangan. Shundan so‘ng tezkor ravishda Termiz harbiy gospitalidan Markaziy harbiy gospitalga o‘tkazish buyurilgan va 11-noyabrda o‘tkazilgan, — deydi vazirlik mas’uli.
Bahodir Abdulahatov marhumning jasadidagi izlarni tig‘ izi deb adashganini, agar ular vazirlik taqdim etgan video va xulosalar bilan tanishsa, vazirlik xulosasiga qo‘shilishini aytmoqda.
O‘sha tez yordam shifokori bizdagi videolarni ko‘rib, xulosalarni bilganda, men yuz foiz kafolat berib aytamanki, o‘sha shifokor biz aytgan xulosani ma’qullar edi, — deydi u.
Izoh (0)