Qashqadaryo viloyatining Qarshi shahridagi prezident maktabini 24 nafar bitiruvchi tamomladi. Ularning 18 nafari o‘qishni tugatmasidan avval xorijdagi Oliy taʼlim muassasasi talabasi bo‘lishga ulgurgan. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Taʼkidlanishicha, Qarshi shahridagi prezident maktabida “Ilmni qadrlang, ilmga intiling” shiori ostida so‘ngi qo‘ng‘iroq tadbiri bo‘lib o‘tgan.
“Tantanali kechada viloyat hokimi Murodjon Azimov ham ishtirok etib, qadrdon maktab, mehribon ustozlar bilan xayrlashib, hayotning yangi bosqichiga qadam qo‘yayotgan yurtimizning ertasi bo‘lgan yoshlarni samimiy qutladi. Ularning ota-onalariga murojaat qilib, farzandlarining iqboli va yorqin kelajagini ko‘rish, ularning taʼlim-tarbiyasiga investitsiya kiritish orqali kelajakda xalqimiz uchun yetuk kadrlar bo‘lishini tiladi”, — deydi Ahror Sodiqov.
Tadbirda aytilishicha, Qarshi shahridagi prezident maktabiga kirish imtihonlarida 1 ta o‘ringa o‘rtacha 150-170 nafardan talabgor to‘g‘ri keladi.
“Mazkur zamonaviy, ko‘rsa ko‘z quvnaydigan maktabda tahsil olayotgan 167 nafar o‘quvchi uchun jahon standarti talablariga mos jihozlangan o‘quv, laboratoriya, IT xonalari, ochiq va yopiq turdagi sport maydoni, suzish havzasi, 168 o‘rinli yotoqxona, oshxona hamda tibbiy xizmat xonalari mavjud. Darslar umumiy o‘rta taʼlimning davlat taʼlim standartlari va Kembrij xalqaro baholash tashkilotining moslashtirilgan dasturlari asosida 29 nafar mahalliy va 7 (4 nafar Filippin, 1 nafar Keniya, 1 nafar Janubiy Afrika Respublikasi va 1 nafar Buyuk Britaniya) nafar xorijiy ustozlar tomonidan olib boriladi”, — dedi tadbirda so‘z olgan viloyat hokimi Murodjon Azimov.
Qo‘shimcha qilinishicha, maktabning 18 nafar bitiruvchisi muddatidan avval talabalik baxtiga muyassar bo‘lgan. Ularning 7 nafari dunyoning TOP-500 talik oliy o‘quv yurtlariga qabul qilingan. Barchasi xorijiy tillarni bilish bo‘yicha xalqaro sertifikatlarni qo‘lga kiritgan.
Izoh (0)