“Daryo”da Toshkent shahar sudining ochiq majlislaridan birida kamdan kam kuzatiladigan holat haqida so‘z yuritilgan “Sudyalar hayʼati OAVni rad etdi, advokat esa sudyalar hayʼatiga ‘otvod’ berdi: Toshkent shahar sudida kamdan kam kuzatiladigan jarayon sodir bo‘ldi”, sarlavhali material eʼlon qilingandi. Oliy sud axborot xizmati mazkur xabarni tanqidiy maqola sifatida qabul qilib, hissiyotga yo‘g‘rilgan munosabat bildirgan edi.
Advokat Hayrullo Qosimov Oliy sud axborot xizmati tomonidan bildirigan munosabat Oliy sud Plenumining qarori qonunchilik yoki qonun hujjati emasligi haqida “Daryo”ga o‘z munosabatini bildirdi.
“Yer bilan osmoncha farqi bor”
Bugun Oliy sudning Telegram’dagi rasmiy kanalida “Daryo.uz” saytida berilgan maqola yuzasidan chiqarilgan munosabat eʼtiborimni tortdi. Xabardagi maʼlumot o‘z yo‘liga, lekin shu kichkina xabarning o‘zida Oliy sud Plenumining qarori ikkita joyda qonunchilik hujjati sifatida, bitta joyda qonun hujjati sifatida ko‘rsatib o‘tilgan.
Aslida Oliy sud Plenum qarorlari qonunchilik hujjatlari ham, qonun hujjati ham emas. Plenum qarorlarida sud amaliyotining dolzarb masalalari yuzasidan qonunchilikning qo‘llanilishi yuzasidan tushuntirishlar beriladi. Qonunchilik hujjati bilan unga berilgan tushuntirishning yer bilan osmoncha farqi bor.
“Normativ-huquqiy hujjatlar to‘g‘risida” gi qonunning 6-moddasiga ko‘ra normativ-huquqiy hujjatlarning turlari quyidagilardan iborat:
- O‘zbekiston Respublikasining Konstitutsiyasi;
- O‘zbekiston Respublikasining qonunlari;
- O‘zbekiston Respublikasi Oliy Majlisi palatalarining qarorlari;
- O‘zbekiston Respublikasi Prezidentining farmonlari va qarorlari;
- O‘zbekiston Respublikasi Vazirlar Mahkamasining qarorlari;
- vazirliklar, davlat qo‘mitalari va idoralarning buyruqlari hamda qarorlari;
- mahalliy davlat hokimiyati organlarining qarorlari.
Shu qonunning 7-moddasiga ko‘ra normativ-huquqiy hujjatlar qonunchilik hujjatlari bo‘lib, ular O‘zbekiston Respublikasining qonunchiligini tashkil etadi.
O‘zbekiston Respublikasining Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari qonun hujjatlaridir.
“Sudlar to‘g‘risida”gi qonunning 22-moddasiga ko‘ra O‘zbekiston Respublikasi Oliy sudi Plenumi sud amaliyotini umumlashtirish materiallarini ko‘rib chiqadi va qonunchilikni qo‘llash masalalari bo‘yicha tushuntirishlar beradi.
Agar boshqa birorta saytda shunday xatoga yo‘l qo‘yilsa tushunish mumkin, lekin sud tizimining eng yuqori organidan bunday xatolik chiqsa hazm qilish ozgina qiyin bo‘larkan.
“Daryo” internet-nashri Oliy sud axborot xizmatiga o‘zlarining munosabatidan kelib chiqib bir nechta savollar bilan chiqqan edi. Lekin bu bo‘yicha Oliy suddan javob bo‘lganicha yo‘q.
Izoh (0)