O‘zLiDePdan prezidentlikka nomzod Shavkat Mirziyoyev 15-iyun kuni farg‘onalik saylovchilar bilan uchrashuvda fermerlar va klasterlar faoliyatining huquqiy kafolatlari kuchaytirilishini aytdi.
O‘z saylovoldi dasturi yuzasidan ma’ruza qilgan Shavkat Mirziyoyevning so‘zlariga ko‘ra, klasterlar va fermerlar o‘rtasidagi shartnoma munosabatlari to‘liq qayta ko‘rib chiqiladi. Klasterlar tomonidan fermerlarga ko‘rsatilgan qo‘shimcha xizmatlar ular bilan o‘zaro kelishuv asosida alohida hisob-kitob qilinadi.
“Bundan buyon, tumanda reja bajarilmayapti, chorva, parranda yoki baliqchilikka ozuqa-yem kerak, degan vajlar bilan fermerlar faoliyatiga aralashishga qat’iyan chek qo‘yiladi”, — dedi nomzod.
Uning ta’kidlashicha, Qishloq xo‘jaligi vazirligi tizimi, hokimlar fermer va klasterlar mahsulotlariga bozor topishga ko‘maklashish bilan shug‘ullanadi. Fermerlarning faoliyat turini o‘zgartirishi soddalashgan tartibda bo‘ladi.
Bundan tashqari, qishloq xo‘jaligida klasterlar va fermerlarning yerini haqiqiy bozor aktiviga aylantirish bo‘yicha yangi tizim yaratiladi. Yerning ijara huquqini boshqa shaxsga o‘tkazish, hadya qilish, kredit olishda garov sifatida foydalanish mumkin bo‘ladi.
Izoh (0)