“Daryo” internet nashri vakili Toshkent shahar sudida Jinoyat ishlari bo‘yicha apellyatsiya sudlov hayʼati tomonidan ko‘rib chiqilishi rejalashtirilgan firibgarlik bilan bog‘liq jinoyat ishini yoritishda to‘siqqa uchradi. Ochiq sud majlisi bo‘lishiga qaramasdan sudlov hayʼati tomonlar fikrini ro‘kach qilib, OAV faoliyatiga to‘siq qo‘ydi. Jurnalistning foto va video materiallar, hatto audiomaterial olishini ham taqiqladi. Bunga javoban esa mazkur ish bo‘yicha tomonlardan biriga himoyachi vazifasini bajarayotgan advokat Temur Rahmatov sudyalar hayʼatiga “otvod berdi”. Voqea haqida mazkur jarayonga guvoh bo‘lgan “Daryo” muxbiri xabar bermoqda.
Maʼlum bo‘lishicha, Jinoyat ishlari bo‘yicha Sergeli tuman sudining 2023-yil 3-maydagi hukmiga ko‘ra, sudlanuvchi T.O. Jinoyat kodeksining 168-moddasi 4-qismining “a” (juda ko‘p miqdorda firibgarlik jinoyatini sodir etish) bandi bilan aybdor deb topilgan va 9 yilga ozodlikdan mahrum qilingan.
“Daryo” internet nashriga qilingan murojaatga ko‘ra, tahririyat jurnalisti sudning qay darajada shaffof va oshkora o‘tayotganini ommaga ko‘rsatish maqsadida mazkur jarayonda ishtirok etish uchun sud majlisida qatnashib, foto va videomateriallar olishga urindi. Biroq sudyalar hayʼati “tomonlar fikrini inobatga olyapmiz”, deya, ochiq sud majlisida jurnalistning foto, video va audio materiallar to‘plashiga to‘siq qo‘ydi. Sudda ish qurollarsiz, shunchaki kuzatuvchi sifatida o‘tirishi kerakligini uqtirdi.
Mazkur voqeadan so‘ng, tomonlardan biriga himoyachi vazifasini bajarayotgan advokat Temur Rahmatov sudyalar adolatiga shubha bildirib, bu sud hayʼatining mazkur ishni ko‘rib chiqishiga norozi ekanini, shu sabab ularni rad etganini bayon qilib, iltimosnoma kiritdi.
Advokat o‘z iltimosnomasiga himoyasidagi sudlanuvchining aybiga qo‘shimcha tarzda mahkum N.J. bilan o‘zaro jinoiy til biriktirib, jabrlanuvchi T.H. ishonchiga kirib, uning 145 ming dollar pulini firibgarlik yo‘li bilan qo‘lga kiritishda aybli deb topilgani qo‘shilganini, mahkum N.J. Jinoyat ishlari bo‘yicha Yunusobod tuman sudining 2023-yil 23-fevraldagi jinoyat ishi bo‘yicha aybli deb topilib hukm qilinganini va mazkur hukm Toshkent shahar sudi Jinoyat ishlari bo‘yicha apellyatsiya sudlov hayʼatida sudya F.To‘raxo‘jayev ishtirokida ko‘rilganini aytib, bu ishda ham raislik qiluvchi sifatida qatnashayotgani sabab, unga va ikki sudyaga “otvod berdi”.
“Mahkum N.J.ni aynan 145 ming dollarni firibgarlik yo‘li bilan qo‘lga kiritgan deya aybdor deb topgansiz. Bu borada xulosangizni bilamiz. Shu sabab himoyamdagi T.O. ishida ham unga nisbatan ayblov eʼlon qilinishida aynan shu ish, o‘zganing 145 ming dollar pulini firibgarlik bilan qo‘lga kiritgan degan ayblov versiyasi mavjudligini inobatga olsak, bu ishda sizning adolatli bo‘lishingizga shubha bildiraman”, — dedi advokat sudyalar tarkibini rad etishi haqida gapirar ekan.
Sudyalar hayʼatiga kiritilgan mazkur iltimosnoma ham rad etildi.
Sudya To‘raxo‘jayevning iltimosnomani rad etishi borasidagi tushuntirishida aytilishicha, haqiqatan ham u va uning bir nafar sherigi advokat aytgan masaladagi sud ishida ishtirok etgan va xulosa bergan. Ammo mazkur sudyalar hayʼatidagi uchinchi sudya advokat aytgan sud ishida qatnashmaganligi sababli advokatning butun tarkibni rad etish haqidagi iltimosnomasi rad etiladi. Sud maʼlum muddatga tanaffus eʼlon qildi.
“Daryo” sudyalar tarkibida o‘zgarish bo‘lishi kutilayotgan sudlov hayʼatiga yana iltimosnoma kiritib, sud jarayonidan foto, video va audiomateriallar to‘plashga harakat qiladi.
Izoh (0)