Xorazm viloyatining Gurlan tumanida fuqaro tinch yurishi uchun undan pul undirib kelganlarga jinoyat ishi qo‘zg‘atildi. Bu haqda IIV Tergov departamenti xabar berdi.
Ma’lum qilinishicha, 9-iyun kuni 38 yoshli I.U. tuman IIB boshlig‘ining nomiga ariza bilan murojaat qilib, uni 36 yoshli M.B. va 30 yoshli M.E. unga ko‘chada tinch yurishi uchun aytgan pullarni o‘z vaqtida ushbu shaxslarga berib borishini, aks holda mol-mulkiga shikast yetkazishlarini aytgani, uni o‘z mulki yoki mulkka bo‘lgan huquqini berishga majbur qiladigan sharoitga solib qo‘yganini ma’lum qilgan.
Ushbu shaxslar 2022-yil 6-dekabrdan 2023-yil fevralgacha undan 58 million so‘m olib kelgan bo‘lishiga qaramasdan, 6—8-iyun kunlari unga qo‘ng‘iroq qilib, 10 ming AQSH dollari topib olib kelishini talab qilgan. Aks xolda uni tinch qo‘ymasligini, ushbu pullarni olib kelmagan taqdirda, unga tegishli transport vositalarini tortib olib qo‘yish bilan qo‘rqitib kelgan.
Mazkur ariza asosida viloyat IIB TQX JQB UJQKB xodimlari tomonidan uyushgan jinoyatchilikka qarshi kurashish bo‘yicha, olib borilgan tezkor tadbir davomida yuqorida ko‘rsatilgan shaxslar arizachi bilan oldindan kelishilgan Gurlan tumani Mustaqillik ko‘chasida joylashgan kafeda uchrashib, undan talab qilgan 10 ming dollarni olayotganida ashyoviy dalillar bilan ushlangan.
Mazkur holat yuzasidan Gurlan tumani IIB huzuridagi Tergov guruhi tomonidan M.B. va M.E.ga nisbatan kodeksning 165-moddasi (tovlamachilik) 2-qismi “b”, “v” bandlari bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Izoh (0)