Iyul oyidan boshlab Birlashgan Millatlar Tashkilotining Jahon oziq-ovqat dasturi Suriyada tashkilot qo‘llab-quvvatlaydigan 5,5 million aholining qariyb yarmiga oziq-ovqat yordami va mablag‘ni qisqartiradi. Bu haqda 13-iyun kuni gumanitar tashkilot saytida ma’lum qilindi.
Mutaxassislarning ta’kidlashicha, bunday qattiq chora zarur oziq-ovqat ratsionining shundoq ham yarmini olayotgan va zo‘rg‘a kun ko‘rayotgan 2,5 million kishiga ta’sir qiladi.
Yordamning kamayishi unga ajratilgan mablag‘larning tez tugab qolayotgani, operatsion xarajatlarning o‘sishi va joylarda ehtiyojlarning ortishi bilan bog‘liq.
Shu zaylda ketsa oktabr oyidan boshlab Afg‘oniston, Bangladesh, Chad, Mali, Falastin, Tanzaniya va Yaman kabi mamlakatlarga ko‘rsatilayotgan yordam darajasini saqlab turishning imkoni bo‘lmaydi, deb qo‘shimcha qiladi ekspertlar.
Suriya uchun zudlik bilan kamida 180 million dollar kerak
BMT tashkilotida aytilishicha, yil oxirigacha yordamni qisqartirmaslik uchun Suriyaga zudlik bilan kamida 180 million dollar (166 million yevro) kerak.
“Ratsionni bundan keyin ham kamaytirib bo‘lmaydi. Yagona yechimimiz — yordam oluvchilarning sonini qisqartirish”, — deydi Jahon oziq-ovqat dasturining Suriyadagi direktori Kenn Krossli. “Biz yordam berayotgan odamlar mojaroning halokatli oqibatlarini boshdan kechirgan, uylarini tashlab ketgan, oila a’zolarini va tirikchilik uchun zarur vositalarini yo‘qotgan. Bizning ko‘magimiz bo‘lmasa, ularning uqubatlari yanada ortadi”.
Suriya va Turkiya chegarasidagi kuchli zilzila
6-fevral kuni Suriya va Turkiya chegarasida 7,4 magnitudali kuchli zilzila sodir bo‘lib, ommaviy qurbonlar va yirik vayronagarchiliklarga olib kelgandi. Bu so‘nggi 100 yil ichida Suriyadagi eng kuchli zilzilalardan biriga aylandi. Mamlakat bosh vaziri Husayn Arnus 7-may kuni voqea oqibatlari haqida ma’lumot berdi. Uning so‘zlariga ko‘ra, tabiiy ofat ta’sirida mamlakatda 225 ming oila jabrlangan, 1 414 kishi halok bo‘lgan va 2 367 kishi jarohatlangan, 1 553 kishi vayronalar ostidan qutqarilgan.
Xorijiy davlatlar rahbarlari halokatli tabiiy ofat munosabati bilan hamdardlik bildirib, har tomonlama yordam ko‘rsatdi. Yevropa Ittifoqi tabiiy ofatlarga javob berishning yuqori mexanizmini joriy qildi.
Izoh (0)