Livanning An Nahar gazetasi 6-fevraldagi zilziladan uch oydan ko‘proq vaqt o‘tib, Suriya—Turkiya chegarasi yaqinidagi vayronalar ostidan tirik odam topilgani haqidagi xabarni rad etdi. Bunday xabar “Akhbar.fouri” portalida e’lon qilingandi, unda yer silkinishidan omon qolgan erkakning surati ko‘rsatilgan.
Portalning taʼkidlashicha, suratda Idlib viloyatidagi Xon Shayxun shahrida yashovchi 1984-yilda tug‘ilgan Ahmad al-Susiy tasvirlangan. Uning amakivachchasi suratni nashrga berib, to‘shakka mixlanib qolgan Susiyga odamlar e’tiborini qaratmoqchi va shu orqali uning davolanishi uchun pul to‘plamoqchi bo‘lgan.
An Nahar gazetasi bemorning akasi bilan bog‘lanishga muvaffaq bo‘ldi, u Ahmad as-Susi hozir Kfar Jelis qochqinlar lagerida istiqomat qilayotganini, uning ahvoli juda og‘ir ekanini tasdiqladi. Uning so‘zlariga ko‘ra, “Akhbar.fouri” nashri e’lon qilgan surat taxminan yetti yil avval olingan bo‘lib, ukasining tanasidagi yaralar vayronalar ostida uch oy qolganidan emas, balki psoriaz (yuqumli bo‘lmagan teri kasalligi) tufayli paydo bo‘lgan.
Avvalroq portal 16-may kuni qutqarilgan suriyalik go‘yoki mahalliy kasalxonaga olib ketilgani va shifokorlar nazoratida ekani, u uzoq reabilitatsiyadan o‘tishi haqida xabar bergandi.
7-may kuni Suriya Xalq Kengashida (parlamentida) so‘zga chiqqan bosh vazir Husayn Arnus zilzila oqibatlari haqida ma’lumot bergan edi. Uning aytishicha, 6-fevraldagi tabiiy ofat oqibatida 225 ming oila jabr ko‘rgan, 1 414 kishi halok bo‘lgan, 2 367 kishi jarohatlangan, 1 553 odam vayronalar ostidan qutqarilgan. “Jabrlanganlarning umumiy soni 1 milliondan oshdi, uyidan ayrilganlar vaqtinchalik yashash uchun 32 ta markazga joylashtirildi”, — dedi bosh vazir.
Arnusning so‘zlariga ko‘ra, texnik ekspertizadan so‘ng Halab va Latakiya viloyatlaridagi 216 mingta binodan 9 mingdan ortig‘i yashash uchun yaroqsiz bo‘lib qolgani va buzib tashlash kerakligi aniqlangan.
Izoh (0)