Июль ойидан бошлаб Бирлашган Миллатлар Ташкилотининг Жаҳон озиқ-овқат дастури Сурияда ташкилот қўллаб-қувватлайдиган 5,5 миллион аҳолининг қарийб ярмига озиқ-овқат ёрдами ва маблағни қисқартиради. Бу ҳақда 13 июнь куни гуманитар ташкилот сайтида маълум қилинди.
Мутахассисларнинг таъкидлашича, бундай қаттиқ чора зарур озиқ-овқат рационининг шундоқ ҳам ярмини олаётган ва зўрға кун кўраётган 2,5 миллион кишига таъсир қилади.
Ёрдамнинг камайиши унга ажратилган маблағларнинг тез тугаб қолаётгани, операцион харажатларнинг ўсиши ва жойларда эҳтиёжларнинг ортиши билан боғлиқ.
Шу зайлда кетса октябрь ойидан бошлаб Афғонистон, Бангладеш, Чад, Мали, Фаластин, Танзания ва Яман каби мамлакатларга кўрсатилаётган ёрдам даражасини сақлаб туришнинг имкони бўлмайди, деб қўшимча қилади экспертлар.
Сурия учун зудлик билан камида 180 миллион доллар керак
БМТ ташкилотида айтилишича, йил охиригача ёрдамни қисқартирмаслик учун Сурияга зудлик билан камида 180 миллион доллар (166 миллион евро) керак.
“Рационни бундан кейин ҳам камайтириб бўлмайди. Ягона ечимимиз — ёрдам олувчиларнинг сонини қисқартириш”, — дейди Жаҳон озиқ-овқат дастурининг Суриядаги директори Кенн Кроссли. “Биз ёрдам бераётган одамлар можаронинг ҳалокатли оқибатларини бошдан кечирган, уйларини ташлаб кетган, оила аъзоларини ва тирикчилик учун зарур воситаларини йўқотган. Бизнинг кўмагимиз бўлмаса, уларнинг уқубатлари янада ортади”.
Сурия ва Туркия чегарасидаги кучли зилзила
6 февраль куни Сурия ва Туркия чегарасида 7,4 магнитудали кучли зилзила содир бўлиб, оммавий қурбонлар ва йирик вайронагарчиликларга олиб келганди. Бу сўнгги 100 йил ичида Суриядаги энг кучли зилзилалардан бирига айланди. Мамлакат бош вазири Ҳусайн Арнус 7 май куни воқеа оқибатлари ҳақида маълумот берди. Унинг сўзларига кўра, табиий офат таъсирида мамлакатда 225 минг оила жабрланган, 1 414 киши ҳалок бўлган ва 2 367 киши жароҳатланган, 1 553 киши вайроналар остидан қутқарилган.
Хорижий давлатлар раҳбарлари ҳалокатли табиий офат муносабати билан ҳамдардлик билдириб, ҳар томонлама ёрдам кўрсатди. Европа Иттифоқи табиий офатларга жавоб беришнинг юқори механизмини жорий қилди.
Изоҳ (0)