“Tolibon” Afg‘onistonning Tojikistondagi elchisi Muhammad Zohir Agbarning uyini yoqib yubordi. Bu haqda elchining so‘zlariga tayanib, Sputnik Tojikiston xabar berdi.
![](/static/2023/zulfiya/photo_2023-06-12_16-53-17.jpg)
Panjsherning Ruxin tumanida joylashgan uydagi yong‘in 11-iyunda boshlangan va hozir ham davom etmoqda. Bino 1998-yilda Ahmad Shoh Mas’uddan moliyaviy yordam sifatida olingan pul evaziga qurilgan.
“Uy olovda yonishi mumkin, ammo bizning ruhimiz va irodamiz yonmaydi”, — deydi Muhammad Zohir Agbar.
2021-yil sentabrida Panjsher darasi egallab olingandan so‘ng, turar joy “Tolibon”ning harbiy qarorgohiga aylandi.
“Ular shuni bilishlari kerakki, uylar yonib ketishi mumkin, lekin terrorizm va zulmga qarshilik ruhi bundan mustasno”, — degan elchi.
Bu Panjsherda “Tolibon”ga qarshi muxolifat uylariga o‘t qo‘yish bilan bog‘liq yagona holat emas.
2023-yil yanvarida Afg‘oniston Milliy qarshilik fronti bilan aloqador bo‘lgan Afg‘oniston adliya vaziri Fazl Ahmad Manaviyning uyi yoqib yuborilgandi. Har ikki holatda ham “Tolibon” mahalliy aholiga yong‘inni o‘chirishga to‘sqinlik qilgani aytilmoqda.