Afg‘onistonning Zobul viloyati markazi Qalat shahrida yo‘lovchi avtobusi va yuk mashinasi to‘qnashib ketdi. Yo‘l transport hodisasi oqibatida 9 kishi, jumladan, ayollar va erkaklar halok bo‘ldi, 31 kishi jarohatlandi. Bu haqda “Daryo”ning Afg‘onistondagi muxbiri xabar berdi.
Hodisa 8-iyun kuni ertalab Qalat shahrining Puli sangi hududida sodir bo‘ldi. Bu Afg‘onistonda so‘nggi 24 soat ichida yuz bergan ikkinchi avariya.
7-iyun kuni Afg‘oniston shimolidagi Saripul viloyatining Sayad tumanida yengil avtomobilning yo‘ldan chiqib, ag‘darilib ketishi oqibatida 24 kishi halok bo‘lgandi. Qurbonlarning sakkiz nafari bolalar.
Avvalroq Saripul viloyatidagi ikkita maktabda 80 nafar qiz va ayol o‘qituvchilar zaharlangani haqida xabar berilgandi. Birlashgan Millatlar Tashkilotining Afg‘onistondagi Bolalar jamg‘armasi (UNICEF) o‘quvchi va o‘qituvchilar zaharlanishidan xavotir bildirdi va tergov o‘tkazishni talab qildi. UNICEF “Tolibon” muvaqqat hukumat rasmiylaridan voqeani to‘liq tergov qilishga, ayollar va qizlarni himoyaga olishga chaqirdi.
Ayrim ma’lumotlarga ko‘ra, zaharlanish alomatlari orasida diareya, ko‘ngil aynishi, bosh aylanishi, yurak urishi va nafas olish qiyinlashishi qayd etilgan. Hozirda 24 nafar qiz shifokorlar nazorati ostida ekani ta’kidlanmoqda.
Izoh (0)