“Tolibon” o‘z yetakchilarining ismini BMT qora ro‘yxatidan olib tashlashni talab qildi

“Tolibon” bosh vaziri vazifasini bajaruvchi BMT bosh kotibining Afg‘onistondagi maxsus vakili bilan uchrashuvda ayrim yetakchilarining ismlarini BMT qora ro‘yxatidan olib tashlashni talab qildi. Bu haqda Hasht-e Subh Daily xabar berdi.

Muhammad Abdul Kabir 10-iyun kuni tegishli talab bilan UNAMA rahbari Roza Otunbayevaga murojaat qildi. U xalqaro hamjamiyat bu boradagi majburiyatlarini bajarishi kerakligini aytdi.

“Tolibon” Afg‘onistondagi xalqaro tashkilotlar faoliyatiga ko‘plab cheklovlar qo‘ygan bo‘lsa-da, Abdul Kabir xalqaro yordam tashkilotlaridan mamlakatdagi faoliyatini davom ettirishni so‘ragan.

“Xalqaro hamjamiyat kutilayotgan loyihalarni yakunlashi, Jahon banki kabi xalqaro tashkilotlar esa Afg‘onistondagi faoliyatini davom ettirishi kerak”, — degan u.

Ayni paytda UNAMA rahbari Roza Otunbayeva Afg‘oniston xalqi insonparvarlik yordamiga har qachongidan ham muhtoj ekanini bildirgan.

“Biz Xitoy va Hindistondan afg’on fermerlariga yordam berishlarini ham so’radik” — dedi u.