O‘zbekistonda taqiqlovchi yo‘l belgilarini o‘rnatish masalasi tartibga keltirilib, yangicha tizim yaratiladi. Bu haqda Adliya vazirligi jamoatchilik muhokamasiga qo‘ygan “Yo‘l harakati xavfsizligi to‘g‘risidagi O‘zbekiston Respublikasining qonuniga yo‘l harakatini tartibga solishning shaffofligi va ochiqligini oshirishga qaratilgan o‘zgartirish va qo‘shimchalar kiritish haqida”gi qonun loyihasida keltirib o‘tilgan.
Qonun loyihasida yozilishicha, endi taqiqlovchi yo‘l belgilari faqat Qoraqalpog‘iston Respublikasi Vazirlar Kengashi raisi, viloyat, tuman (shahar) hokimining qarori asosida o‘rnatiladi. Taqiqlovchi yo‘l belgilari o‘rnatilishidan kamida 20 kun oldin bunday qaror qilish sabablari haqida jamoatchilik mahalliy ijro hokimiyati organining tegishli rasmiy internet sahifalari va ommaviy axborot vositalari orqali xabardor qilinadi.
Ta’kidlanishicha, qonun kuchga kirgach, yo‘l belgilari reyestri shakllantiriladi. Reyestrga kiritilmagan taqiqlovchi yo‘l belgilari huquqiy oqibat keltirib chiqarmaydi. Bundan tashqari, yo‘l belgilarining dislokatsiyasi onlayn tarzda e’lon qilib boriladi.
Vakolatli davlat organlari fuqarolarning yo‘l harakatini tartibga solish texnik vositalarini o‘rnatish to‘g‘risidagi murojaatlarini belgilangan tartibda ko‘rib chiqadi. Shundan so‘ng davlat standartlari, yo‘l harakati xavfsizligi sohasidagi normativ hujjatlar talablari asosida yo‘l harakatini tartibga solish texnik vositasi o‘rnatilishi yoki o‘rnatish zarurati mavjud emasligi haqida qaror qabul qiladi.
Avtomobil yo‘llarini qurish, rekonstruksiya qilish va ta’mirlashda yo‘l harakati xavfsizligi, atrof-muhit muhofazasi, shuningdek, nogironligi bo‘lgan shaxslarning huquqlari bilan bog‘liq barcha chora-tadbirlar nazarda tutiladi.
Adliya vazirligi boshqarma boshlig‘i Furqat Tojiyevning 12-iyun kuni AOKAda o‘tgan matbuot anjumanida aytishicha, hozirda qonunchilikda yo‘l belgilarni o‘rnatishning huquqiy asoslari, ularni amalga oshirish tartibi va mexanizmlari aniq belgilab berilmagan.
“Natijada joylarda huquqni qo‘llash amaliyoti turlicha shakllangan bo‘lib, yo‘l belgilarini tegishli asoslarsiz o‘rnatish holatlari mavjud. Misol uchun, birinchi instansiya ma’muriy sudlari tomonidan 2022-yil davomida tuman va shahar hokimlarining yo‘l belgilarini o‘rnatish to‘g‘risidagi 5 ta qarori bekor qilingan”, — deya tushuntirdi Furqat Tojiyev.
Uning qo‘shimcha qilishicha, taqiqlovchi yo‘l belgilari yo‘l harakati qatnashchilarini oldindan xabardor qilmasdan o‘rnatilmoqda.
“Ma’lumotlarga ko‘ra, yo‘l harakati xavfsizligi sohasida har yili o‘rtacha 7 milliondan ortiq turli qoidabuzarlik holatlari kuzatilmoqda. O‘z navbatida, yo‘l belgilari o‘rnatilishi to‘g‘risida jamoatchilik oldindan xabardor qilinmasligi singari omillar qoidabuzarliklar soniga ta’sir qilmasdan qolmaydi. Bundan tashqari, yo‘l belgilari o‘rnatilishida ochiqlik va shaffoflikni ta’minlash hamda ta’sirchan jamoatchilik nazoratini olib borish uchun yetarlicha shart-sharoit yaratilmagan. Xususan, yo‘l belgilarining reyestrini yuritish va dislokatsiyasini e’lon qilib borish amaliyoti mavjud emas”, — deb aytib o‘tdi Adliya vazirligi boshqarma boshlig‘i.
Izoh (0)