Farg‘ona viloyati Marg‘ilon shahrida 7 yoshli bolani qutqarib, o‘zi qochishga ulgurmagan ayolni poyezd bosib ketdi. Bu haqda Bosh prokuratura axborot xizmati “Daryo”ga ma’lum qildi.
Unga ko‘ra, voqea 2-iyun kuni 10:40 larda sodir bo‘lgan. Bu vaqtda “O‘zbekiston” lokomotiv deposi mashinisti A.Sharipov boshqaruvidagi elektrovoz Andijon—Xiva yo‘nalishidagi 125-sonli yo‘lovchi poyezdi bilan Oxunboboyev—Marg‘ilon temiryo‘l bekatlari oralig‘i 261-km 7-piketida harakatlanib ketayotgan bo‘lgan.
Farg‘ona shahar, “Xo‘jamag‘iz” MFY, T.Mamajonov ko‘chasida yashagan, oilali, 3 nafar farzandi bor, Marg‘ilon shahridagi 29-sonli umumtaʼlim maktabida farrosh bo‘lib ishlagan, 1981-yilda tug‘ilgan M.D. temiryo‘lda piyodalar o‘tish yo‘lagidan o‘zi bilan birga bir yo‘nalishda ketayotgan 7 yoshli bolani qutqarmoqchi bo‘lgan. U yo‘lovchi poyezdi yaqinlashib kelayotganini ko‘rib, voyaga yetmagan bolani yelkasidan turtib, chetga chiqarib yuborgan va o‘zi poyezddan qochishga ulgurmagani natijasida voqea joyida vafot etgan.
Mazkur holat yuzasidan xozirda Farg‘ona transport prokuraturasi tomonidan tergovga qadar tekshiruv ishlari olib borilmoqda.
Izoh (0)