Qashqadaryo viloyatining Yakkabog‘ tumanida yashovchi bloger Elmurod Odilov dastlab pilla punktida kaltaklangani, keyinchalik 15 sutkaga qamalgani haqida xabar berilgandi. Viloyat IIB axborot xizmati “15 sutkaga ketgan” bloger fermerlar noroziligiga sabab bo‘lgani, fermerlar bilan qarama-qarshilikka duch kelganini bildirgandi. “Daryo” qo‘lga kiritgan hujjatlarga ko‘ra, yakkabog‘lik bloger aslida tuman hokimi va hokimlik bosh hisobchisi bilan qarama-qarshilikka borgan.
Jinoyat ishlari bo‘yicha Yakkabog‘ tuman sudining 2023-yil 27-may kuni chiqargan maʼmuriy jazo qo‘llash haqidagi qarorida yozilishicha, bloger Elmurod Odilov tuman hokimi Lutfiddin Abdullayev hamda hokimlik bosh hisobchisi Sunnatilla Rahmonov bilan tortishib qolgan.
Sud hujjatlarida qayd etilishicha, 35 yoshli bloger 2023-yilning 26-may kuni kechki payt soat taxminan 22:00 larda tumanning “Ibn Sino” mahallasi Chinorli ko‘chasida joylashgan pilla mahsulotlarini saqlash binosiga borib, u yerdagi jarayonni tasvirga ola boshlagan.
“Undan nima sababdan videotasvirga olayotganini so‘ragan Sunnatilla Rahmonovni jamiyatda yurish-turish qoidalarini mensimasdan, og‘izga olib bo‘lmaydigan so‘zlar bilan haqorat qilgan”, — deyiladi sud hujjatida.
Hujjatlarda yozilishicha, shuningdek, bloger hokimlik bosh hisobchisi Sunnatilla Rahmonovni haqorat qilgani yetmagandek, tuman hokimi Lutfiddin Abdullayevning oldiga borib, hokimga “birga-bir ko‘rasanmi”, deya mushtlashishga chaqirgan.
Sudda so‘z olgan hokim buni tasdiqlab, 2023-yilning 26-may kuni kechki payt soat 22:00 larda pilla punktida hokimlik xodimlari bilan pilla rejasini bajarish bo‘yicha yig‘ilish qilganini, yig‘ilishga kirib borgan bloger uning yoniga borib, telefonida video olishi davomida “tuman hokimi noqonuniy yig‘ilish o‘tkazyapti, odamlarni nima uchun yig‘ib o‘tiribsan”, deya sansirab gapirganini aytgan. Hokimning qo‘shimcha qilishicha, bloger uni mushtlashishga chaqirib, “men bilan yakkama-yakka chiq”, degan. Shundan so‘ng blogerni IIB xodimlari olib ketgan.
Sud hujjatlarida yozilishicha, blogerning ushbu qilmishi sudda o‘z isbotini topgan. Uning o‘zi ham qilmishiga iqror bo‘lgan. Biroq sud hujjatlarida blogerning fermerlar bilan tortishgani, fermerlarning undan noroziligi haqida gap-so‘z yo‘q.
Eslatib o‘tamiz, Qashqadaryo viloyat IIB axborot xizmati blogerning kaltaklangani haqidagi xabarga munosabat bildirib, blogerni fermerlar ishiga aralashib, ularni haqorat qilganlikda ayblagandi. Ichki ishlar vazirligi axborot xizmati rahbari Shohrux G‘iyosov esa blogerni birovning pulini olib, jamoatchilik nazoratini suiisteʼmol qilganlikda, janjal evaziga mavhum manfaatlarga erishmoqchi bo‘lganlikda ayblagandi.
Izoh (0)