Ўзбекистонда тақиқловчи йўл белгиларини ўрнатиш масаласи тартибга келтирилиб, янгича тизим яратилади. Бу ҳақда Адлия вазирлиги жамоатчилик муҳокамасига қўйган “Йўл ҳаракати хавфсизлиги тўғрисидаги Ўзбекистон Республикасининг қонунига йўл ҳаракатини тартибга солишнинг шаффофлиги ва очиқлигини оширишга қаратилган ўзгартириш ва қўшимчалар киритиш ҳақида”ги қонун лойиҳасида келтириб ўтилган.
Қонун лойиҳасида ёзилишича, энди тақиқловчи йўл белгилари фақат Қорақалпоғистон Республикаси Вазирлар Кенгаши раиси, вилоят, туман (шаҳар) ҳокимининг қарори асосида ўрнатилади. Тақиқловчи йўл белгилари ўрнатилишидан камида 20 кун олдин бундай қарор қилиш сабаблари ҳақида жамоатчилик маҳаллий ижро ҳокимияти органининг тегишли расмий интернет саҳифалари ва оммавий ахборот воситалари орқали хабардор қилинади.
Таъкидланишича, қонун кучга киргач, йўл белгилари реестри шакллантирилади. Рейестрга киритилмаган тақиқловчи йўл белгилари ҳуқуқий оқибат келтириб чиқармайди. Бундан ташқари, йўл белгиларининг дислокацияси онлайн тарзда эълон қилиб борилади.
Ваколатли давлат органлари фуқароларнинг йўл ҳаракатини тартибга солиш техник воситаларини ўрнатиш тўғрисидаги мурожаатларини белгиланган тартибда кўриб чиқади. Шундан сўнг давлат стандартлари, йўл ҳаракати хавфсизлиги соҳасидаги норматив ҳужжатлар талаблари асосида йўл ҳаракатини тартибга солиш техник воситаси ўрнатилиши ёки ўрнатиш зарурати мавжуд эмаслиги ҳақида қарор қабул қилади.
Автомобиль йўлларини қуриш, реконструкция қилиш ва таъмирлашда йўл ҳаракати хавфсизлиги, атроф-муҳит муҳофазаси, шунингдек, ногиронлиги бўлган шахсларнинг ҳуқуқлари билан боғлиқ барча чора-тадбирлар назарда тутилади.
Адлия вазирлиги бошқарма бошлиғи Фурқат Тожиевнинг 12 июнь куни АОКАда ўтган матбуот анжуманида айтишича, ҳозирда қонунчиликда йўл белгиларни ўрнатишнинг ҳуқуқий асослари, уларни амалга ошириш тартиби ва механизмлари аниқ белгилаб берилмаган.
“Натижада жойларда ҳуқуқни қўллаш амалиёти турлича шаклланган бўлиб, йўл белгиларини тегишли асосларсиз ўрнатиш ҳолатлари мавжуд. Мисол учун, биринчи инстанция маъмурий судлари томонидан 2022 йил давомида туман ва шаҳар ҳокимларининг йўл белгиларини ўрнатиш тўғрисидаги 5 та қарори бекор қилинган”, — дея тушунтирди Фурқат Тожиев.
Унинг қўшимча қилишича, тақиқловчи йўл белгилари йўл ҳаракати қатнашчиларини олдиндан хабардор қилмасдан ўрнатилмоқда.
“Маълумотларга кўра, йўл ҳаракати хавфсизлиги соҳасида ҳар йили ўртача 7 миллиондан ортиқ турли қоидабузарлик ҳолатлари кузатилмоқда. Ўз навбатида, йўл белгилари ўрнатилиши тўғрисида жамоатчилик олдиндан хабардор қилинмаслиги сингари омиллар қоидабузарликлар сонига таъсир қилмасдан қолмайди. Бундан ташқари, йўл белгилари ўрнатилишида очиқлик ва шаффофликни таъминлаш ҳамда таъсирчан жамоатчилик назоратини олиб бориш учун етарлича шарт-шароит яратилмаган. Хусусан, йўл белгиларининг реестрини юритиш ва дислокациясини эълон қилиб бориш амалиёти мавжуд эмас”, — деб айтиб ўтди Адлия вазирлиги бошқарма бошлиғи.
Изоҳ (0)