2022-yilda dunyo bo‘ylab o‘ldirilgan jurnalistlar soni sezilarli darajada oshdi. Bu haqda UNESCO hisobotiga tayanib, Deutsche Welle xabar berdi.
UNESCO ma’lumotlariga ko‘ra, 2022-yilda dunyo bo‘ylab 86 nafar jurnalist va media xodimlari o‘ldirilgan, bu har to‘rt kunda bitta qotillik degani. Qayd etilishicha, birgina Meksikada 19 nafar, Ukrainada 10 nafari va Gaitida 9 nafar jurnalist vafot etgan. Bu jurnalistlarning o‘z faoliyati davomida jiddiy xavf va zaifliklarga duch kelayotganidan dalolat beradi.
UNESCO’ning oldingi hisobotlariga ko‘ra, 2019—2021-yillarda o‘rtacha 58 nafar jurnalist o‘ldirilgan, 2021-yilda 55 ta qotillik qayd etilgan. Shu bilan birga, o‘tgan uch yil avvalgi yilga nisbatan o‘limlarning kamaygani bilan ajralib turadi: 2018-yilda 99 jurnalist faoliyati davomida o‘ldirilgan.
UNESCO bosh direktori Odri Azuley o‘z bayonotida 2022-yilda halok bo‘lganlar soni “tashvishli” ekanini aytdi.
“Mamlakatlar hukumatlari bu jinoyatlarga chek qo‘yish va aybdorlarning jazolanishini ta’minlash uchun sa’y-harakatlarini ikki baravar oshirishi kerak, chunki loqaydlik bu zo‘ravonlik muhitining asosiy omillaridan biridir”, — dedi u.
Qotilliklarning to‘rtdan uch qismi mojarodan holi mamlakatlarga to‘g‘ri keladi, o‘limlarning yarmidan ko‘pi Lotin Amerikasida sodir bo‘lgan. Jurnalistlarning o‘ldirilishiga ayrim sabablar uyushgan jinoyatchilik, qurolli to‘qnashuvlar yoki ekstremizmning kuchayishi haqidagi xabarlar uchun “qasos” bilan bog‘liq. Ba’zi jurnalistlar korrupsiya, ekologik jinoyatlar, hokimiyatni suiiste’mol qilish va namoyishlar kabi nozik mavzularni yoritgani uchun o‘ldirilgan.
UNESCO halok bo‘lgan jurnalistlarning deyarli yarmi ish vaqtidagi hujumlar qurboni bo‘lganini qayd etdi. Ba’zilar mashina haydab ketayotgan paytida, to‘xtash joylarida yoki boshqa jamoat joylarida hujumga uchragan, boshqalari esa o‘z uyida qotillik qurboni bo‘lgan.
Izoh (0)