Buxoro viloyati hokimligi “Buxoro turizm markazi” aholi va UNESCO bilan kelishgan holda boshqa yerda qurilishi bo‘yicha ma’lumot berdi.
Hozirda “Buxoro turizm markazi” loyihasi dastlabki bosqichda tayyorlanmoqda. Uning loyihasi puxta ishlab chiqilgandan so‘ng tegishli tartibda barcha kelishuvlardan o‘tkaziladi. Loyiha bo‘yicha keng jamoatchilik va fuqarolar fikri inobatga olib, boshqa maqbul yer maydonlari tanlanadi.
“Shuningdek, UNESCO umumjahon markazining tegishli xulosasi olingan holda, yakuniy qaror qabul qilinadi va shundan so‘ng qurilish ishlari boshlanadi”, — deydi hokimlik matbuot xizmati.
13-yanvar kuni buxoroliklar markaz qurilishidan norozi bo‘lib, prezidentga murojaat yo‘llagandi. Murojaatda aholi Buxoro shahri qoq markazida 2023-yilda turizm markazi qurilishi doirasida shaharning Ibrohim Mo‘minov va Mustaqillik ko‘chalari o‘qi atrofidagi barcha bino va inshootlar, jumladan, katta sport majmuasi ham buzilishidan norozilik bildirgan.
Markaz 33 gektar maydonda qurilishi, Buxoro viloyati budjetidan 2023-yilda 517 milliard so‘m ajratilishi ko‘zda tutilgani xabar qilingan. Holat yuzasidan qurilish va uy-joy kommunal xo‘jaligi vaziri Botir Zokirov “Daryo” muxbiriga bergan qisqacha interyusida bunga izoh bergan.
“Markazning loyiha taklifi bo‘lgach, jamoatchilikka muhokama uchun qo‘yiladi. Buxoro shahrida aholi uchun alohida taqdimot qilib beriladi. Ayni vaqtda o‘rganish ishlari olib borilmoqda, xolos. Bu degani ertadan buzilish boshlanadi degani emas, hali oxirgi nuqta qo‘yilganicha yo‘q. Bu hozir loyiha taklifi, hali YUNESKO bilan kelishish bosqichi bor”, —ta’kidlagan vazir.
Hozir Buxoro turizm markazi tushadigan joyda xatlov ishlari olib borilmoqda. Ya’ni tartibga ko‘ra, u yerda qancha bino bor, kimga tegishli ekani haqida ma’lumot yig‘iladi.
Izoh (0)