Toshkentning Uchtepa tumanidagi 62-sonli maktabning informatika fani o‘qituvchisi kaltaklangani haqida xabar berilgandi. Poytaxt IIBB holat yuzasidan jinoyat ishi qo‘zg‘atilganini ma’lum qildi.
Voqea 8-iyun kuni soat 15.30 larda maktab hududida yuz bergan. Maktabning 9-sinf o‘quvchisi S.S. (2008-yilda tug‘ilgan) va o‘qituvchi S.B. (1999-yilda tug‘ilgan) o‘zaro gap talashib qolgan va o‘qituvchi S.S.ni bir marotaba shapaloq bilan urgan. Shundan so‘ng o‘quvchining akasi — 10-sinf o‘quvchisi bo‘lgan 2006-yilda tug‘ilgan S.S. kelib o‘qituvchi S.B.ni urib, tan jarohati yetkazgan.
O‘zaro kelishmovchilik sababli kelib chiqqan mojaro natijasida o‘qituvchi tan jarohati olgani yuzasidan Uchtepa tumani IIO FMB tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atildi. Jinoyat ishi Toshkent shahar IIBB rahbariyati tomonidan nazoratga olingan.
Mazkur xabarga O‘zbekiston Respublikasi Prezidenti administratsiyasi rahbarining o‘rinbosari Komil Allamjonov munosabat bildirib, bu ishni qilganlar kim bo‘lishidan qat’i nazar, qonunda belgilangan tartibda qattiq jazolanishini ma’lum qildi.
Izoh (0)