Buxoro viloyatining Kogon shahrida er rashk sabab xotinini pichoqlab o‘ldirdi. Bu haqda Bosh prokuratura axborot xizmati rahbari Hayot Shamsutdinov “Daryo”ga ma’lum qildi.

28-may kuni soat 17:30 larda Sh.X. (1992-yilda tug‘ilgan) turmush o‘rtog‘i, ikki nafar farzandning onasi bo‘lgan G.X. (1991-yilda tug‘ilgan) bilan rashk tufayli o‘zaro tortishib, janjal qilgan. Janjal paytida er oshxona pichog‘i bilan turmush o‘rtog‘ining tanasining turli sohalariga (ko‘krak, bo‘yin, qo‘l) bir necha marotaba urib, qasddan o‘ldirgan.

Shuningdek, ajratish maqsadida harakat qilgan gumonlanuvchining onasi O.X. ham o‘ng bilak sohasidan jarohat olib kasalxonaga murojaat qilgan.

Holat yuzasidan 28-may kuni shahar prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, erkak Jinoyat protsessual kodeksining 221-moddasi tartibida ushlangan.

Eri tomonidan pichoqlangan ayollar

Mart oyida Buxoroda er janjal sabab xotinini pichoqlagani, Jizzaxda er rashk sabab avval xotinini keyin esa o‘zini pichoqlab o‘ldirgani haqida xabar berilgan edi. Aprelda Farg‘ona viloyatida erkak rafiqasi va qaynotasini pichoqlab o‘ldirdi. May oyi boshlarida Namangan davlat universitetida erkak o‘z xotinini pichoqlab, uning qotiliga aylandi.