Бухоро вилоятининг Олот туманида хотинини уриб, тан жароҳати етказган эркакка жиноят иши қўзғатилди.
Вилоят ИИБ матбуот хизматининг маълум қилишича, 24 май куни соат 21:30 ларда Олот туманидаги маҳаллада яшовчи эркак Д.Д. (1992 йилда туғилган) яшаш уйида турмуш ўртоғи Б.С. (1993 йилда туғилган) билан ўзаро оилавий келишмовчилик сабаб жанжаллашиб қолиб, жанжал вақтида хотинини урган. Судга оид тиббий экспертизасининг хулосасига кўра, аёлга ўртача оғир шикаст етказилган.
Мазкур ҳолат юзасидан туман ИИБ томонидан фуқаро Д.Д.га нисбатан Жиноят кодексининг 126-1-моддаси (оилавий зўравонлик) 4-қисми билан жиноят иши қўзғатилиб, дастлабки тергов ҳаракатлари олиб борилмоқда.
Ушбу модданинг 4-қисмига кўра, хотинига (эрига), собиқ хотинига (собиқ эрига), бир рўзғор асосида биргаликда яшаётган шахсга ёки умумий фарзандга эга бўлган шахсга содир этилаётган пайтда ҳаёт учун хавфли бўлмаган ва ушбу модданинг олтинчи қисмида назарда тутилган оқибатларга олиб келмаган, лекин соғлиқнинг узоқ вақт, яъни камида 21 кун, аммо 4 ойдан кўп бўлмаган даврда ёмонлашувига ёки умумий меҳнат қобилиятининг 10 фоизидан 33 фоизигача йўқолишига сабаб бўлган қасддан баданга ўртача оғир шикаст етказиш — 360 соатдан 480 соатгача мажбурий жамоат ишлари ёки 2 йилдан 3 йилгача ахлоқ тузатиш ишлари ёхуд 2 йилдан 3 йилгача озодликни чеклаш ёки 2 йилдан 3йилгача озодликдан маҳрум қилиш билан жазоланади.
Изоҳ (0)