Qashqadaryo viloyatining Shahrisabz shahrida qo‘shni xonadonga bostirib kirib, xonadon bekasiga pichoq o‘qtalgan hokimlik xodimi va uning otasi qamaldi. Bu haqda viloyat IIB axborot xizmati xabar tarqatdi.
Maʼlum qilinishicha, tarmoqlarda hokimlik xodimi ekani aytilgan fuqaro va uning otasi qo‘shni xonadonga kirib, to‘polon ko‘targani, ulardan biri xonadon egasiga pichoq o‘qtalib, o‘ldirishga uringani aytilgan video tarqalgan.
Joriy yilning 18-aprel kuni soat 16:40 larda Shahrisabz shahar “Sariosiyo” MFYda yashovchi S.A. o‘g‘li S.U. bilan qo‘shnisi Sh.F.ning yashash uyiga borib, jamiyatda yurish-turish qoidalarini qasddan mensimasdan bir-birini haqoratlab, o‘zaro janjallashgan. Mazkur holat yuzasidan Shahrisabz shahar IIB xodimlari tomonidan surishtiruv harakatlari olib borilib, to‘plangan hujjatlar Jinoyat ishlari bo‘yicha Shahrisabz shahar sudiga yuborilgan, — deyiladi viloyat IIB axborot xizmati xabarida.
“Daryo” manbasiga ko‘ra, qo‘shni xonadonga bostirib kirib, xonadon bekasiga qo‘l ko‘tarishga uringan fuqaro Shahrisabz shahar hokimligining xotin-qizlar bo‘limida faoliyat yuritadi. Xonadon bekasiga pichoq o‘qtalgan kishi esa uning otasi hisoblanadi.
Aytilishicha, sud qaroriga asosan zo‘ravon ota-o‘g‘ilga chora ko‘rilgan.
S.A.ga Maʼmuriy javobgarlik to‘g‘risidagi kodeksning 183-moddasi, 185-2-moddasi 2-qismi bilan 5 sutka, S.U.ga 183-moddasi, 52-moddasining 2-qismi, 612-moddasi 1-qismi bilan 10 sutka, Sh.F.ga 183-moddasi bilan 5 sutka maʼmuriy qamoq jazosi tayinlandi”, — deydi masʼullar.
Izoh (0)