“O‘zgidromet” dam olish kunlari issiq biroz pasayishini ma’lum qildi.
Qayd etilishicha, ushbu haftaning o‘rtasidan O‘zbekistonning g‘arbiy hududlariga Volgabo‘yi hududlaridan nisbatan salqin havo kirib keldi. Ikki kun davomida Qoraqalpog‘iston Respublikasi va Xorazm viloyatida havo harorati 7-10 darajaga pasaydi va kecha kunduzi 30-35 darajani tashkil etdi.
9-iyun Buxoro, Navoiy viloyatlarida, 10–11-iyun kunlari markaziy, janubiy va sharqiy viloyatlarda issiq biroz pasayadi. Biroq, respublika hududining katta qismida haroratning pasayishi shimoliy hududlardek sezilmaydi. Kunduzgi harorat 33-38 darajagacha pasayadi.
Respublika bo‘yicha quruq ob-havo saqlanib turadi, faqat tog‘li hududlarda shanba va yakshanba kunlari qisqa muddatli yomg‘ir yog‘ishi va momaqaldiroq bo‘lishi mumkin.
9–11-iyun kunlari respublika bo‘yicha ba’zi joylarda shamol tezligi 17-22 metr/sekundgacha kuchayishi, ayrim joylarda chang-to‘zon bilan kuzatilishi mumkin.
Toshkentda 9–11-iyun kunlari havo biroz bulutli bo‘ladi, vaqti-vaqti bilan o‘zgarib turadi, yog‘ingarchilik kutilmaydi. Harorat dam olish kunlari 36-38 daraja bo‘ladi.
“Haroratning pasayishi uzoq davom etmaydi. Keyingi haftada harorat foni avvalgi 35-40 daraja, shimolda, janubda va cho‘l hududlarda 41-42 darajagacha bo‘lgan qiymatlarga qaytadi”, — deyiladi xabarda.
Izoh (0)