Davlat xavfsizlik xizmati va Bosh prokuratura huzuridagi departament xodimlari hamkorligida o‘tkazilgan tezkor tadbirda Farg‘onada haj ziyorati bilan bog‘liq firibgarlik holatiga chek qo‘yildi.

Qayd etilishicha, Farg‘ona shahrida faoliyat yurituvchi turistik firma xodimi Marg‘ilon shahrida yashovchi, 36 yoshli fuqaro va uning o‘g‘lini 20 ming AQSH dollari evaziga haj ziyoratiga yuborishni vaʼda qilib, talab qilingan summadan 10 ming dollarni olgan vaqtida ashyoviy dalillar bilan ushlangan.

Tezkor surishtiruv harakatlari davomida, u ushbu pul mablag‘ini turistik firma rahbarining ko‘rsatmasi asosida olgani maʼlum bo‘lgan.

Hozirda holat yuzasidan mazkur shaxslarga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.

“Hurmatli fuqarolar muqaddas haj safariga borishda firibgarlarning tuzog‘iga tushib, aldanib qolmang. Ogoh bo‘ling”, — deyiladi xabarda.

Bundan oldin Marg‘ilon shahrida faoliyat yurituvchi turistik firma rahbari Ya.M. o‘zganing ishonchiga kirib, uni va tanishini haj ziyoratiga yuborish evaziga 16 ming dollar olgan vaqtida ashyoviy dalillar bilan ushlangandi.

Din ishlari bo‘yicha qo‘mita haj safariga yuborayotgan firmalardan ehtiyot bo‘lishga chaqirgandi. “O‘zbekiston uchun ajratilgan haj kvotasi faqatgina Din ishlari bo‘yicha qo‘mita va O‘zbekiston musulmonlari idorasi tomonidan tashkil etiladigan haj safariga otlangan ziyoratchilarga ajratilgan, shunday ekan, ayrimlarning O‘zbekiston orqali haj safariga jo‘natamiz, degan aldovlariga uchmang”, — deya ogohlantirgandi qo‘mita.