Qashqadaryo viloyatining Qarshi shahrida fuqaroga subsidiya asosida uy olib berishini aytib, undan 2700 dollar talab qilgan soliqchi fuqarodan so‘ralgan pulning 700 dollarini olayotganda qo‘lga tushdi.
Mazkur holat DXXning viloyat boshqarmasi va huquqni muhofaza qiluvchi organlar hamkorligida o‘tkazilgan tezkor tadbirda fosh etilgan.
Maʼlum bo‘lishicha, Qarshi shahar Soliq inspeksiyasida bo‘lim boshlig‘i sifatida faoliyat yuritib kelgan A.D. murojaatchi fuqaroga Vazirlar Mahkamasining 2022-yil 14-oktabrdagi “Aholiga ipoteka krediti va uy-joy sotib olish uchun subsidiya ajratish jarayonlarini soddalashtirish chora-tadbirlari to‘g‘risida”gi qaroriga asosan subsidiya ajratib, uy-joy olishida ko‘maklashishini aytgan. Va buning evaziga undan 2700 dollar talab qilgan.
Soliq inspeksiyasi xodimi fuqarodan bu ish uchun 2023-yilning mart oyida 1500 dollar olib, qolgan 1200 dollarini ham talab qila boshlagan. Hamda so‘ralgan pulning 700 dollarini olayotganda DXX va hamkor tashkilotlar tomonidan tashkil etilgan tezkor tadbirda qo‘lga tushgan.
Holat yuzasidan sobiq soliqchiga nisbatan Jinoyat kodeksining 168-moddasi 3-qismi “v” bandi va 28,211-moddasining 1-qismi bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)