Toshkent viloyatidagi mavjud bolalar bog‘chalarida kadrlash yetishmasligi va tarbiyalanuvchilarning ovqatlanish tizimidagi kamchiliklar bilan bog‘liq muammolar bor. Bu haqda viloyat hokimi Zoir Mirzayev 1-iyun — Xalqaro bolalarni himoya qilish kuni munosabati bilan Toshkent tumanida yangi ish boshlagan 560 o‘rinli bog‘cha ochilishida gapirdi, deya xabar berdi “Daryo” muxbiri.
Viloyat hokimi tadbirda so‘z olar ekan, Toshkent tumanining “Hasanboy” mahallasida ish boshlagan bog‘cha qurilishiga 15,6 milliard so‘m sarflanganini, vazirlik mazkur muassasani taʼmirlash uchun yana 1 milliard so‘mdan ortiq mablag‘ sarflaganini ochiqladi.
“Dunyo xalqlarining barchasi bolajon xalq, albatta. Ammo hech qaysi xalq o‘zbek xalqi kabi bolajonlariga mehr bermasa kerak. Bugun butun respublikamizda bo‘lgani kabi, Toshkent viloyatida ham bolajonlar kamoli uchun ko‘plab ishlar amalga oshirilmoqda. Bundan besh-olti yil avval bog‘chalarning aksariyati sotilib, borlari ham nochor holatga kelib qolgandi. Biz hatto kolxozlardan qolgan bog‘chalar bilan ham kun o‘tkazib keldik. Lekin bugungi kunga kelib, biz bog‘chalarimizni zamonaviy binolarga aylantirdik. Tadbirkorlar shunday katta binolarni qurmoqda. Bugun ochilayotgan bog‘cha respublikadagi yagona bog‘chalardan biri”, — deydi viloyat hokimi.
.jpg)
Zoir Mirzayev tadbirda, shuningdek, ommaviy axborot vositalari vakillarini qiziqtirgan savollarga ham javob berar ekan, “Daryo” muxbirining “viloyatdagi mavjud bog‘chalarda eng og‘riqli muammolar nimalardan iborat?”, degan savoliga quyidagicha javob qaytardi.
“Toshkent viloyatidagi mavjud bolalar bog‘chalarida ikkita eng asosiy muammo bor. Birinchisi kadrlar yetishmasligi bo‘lsa, ikkinchisi tarbiyalanuvchilarning ovqatlanishi bilan bog‘liq muammo hisoblanadi. Toshkent viloyatida zamonaviy, barcha talablarga javob beradigan bolalar bog‘chalari ko‘p, ammo bolalarga taʼlim berishda alohida metodik yondashuvga ega, zamon bilan hamnafas kadrlar yetishmayapti. Ayni kunda bolalar bog‘chalari uchun 600 nafarga yaqin malakali kadrlarga ehtiyoj bor. Ikkinchi masala bolalar bog‘chasidagi ovqat masalasidir. Autsorsing tizimi yoki keytering tizimi tanlab olingan. Lekin bu to‘laqonli ishlamayapti. Biz Qibray tumanida Filippin bilan birgalikda bolalar taomlarini ishlab chiqarishni yo‘lga qo‘ymoqchimiz. Masalan, bizda sharbat ishlab chiqaruvchilar bor, lekin yoshi kattalarga ham, bolalar uchun ham ishlab chiqarilgan sharbatlarning tarkibi bir xil. Filippin korxonasidan bog‘chalarimiz uchun keytering xizmatini ko‘rsatishlarini so‘radik. Agar shu loyiha ishga tushsa, ikkinchi muammoga yechim topgan bo‘lamiz”, — deydi viloyat hokimi Zoir Mirzayev.
Izoh (0)