Toshkentda avariya holatidagi ko‘p qavatli uyda yashovchilar boshqa joyga ko‘chirilmoqda

Toshkent shahar Chilonzor tumanida avariya holati sababli ko‘p qavatli uyda yashovchilar boshqa hududga ko‘chirilmoqda. Shahar hokimligi holat yuzasidan ma’lumot berdi.

Unga ko‘ra, Naqqoshlik ko‘chasi 3a-uyda avariya holati yuzaga kelgan. Mazkur manzildagi ko‘p qavatli uyda yoriqlar paydo bo‘layotgani tuman hokimi boshchiligidagi mas’ullar va FVVning Toshkent shahar va tuman bo‘limi mutaxassislari tomonidan o‘rganilib, holat insonlar salomatligi va hayoti xavfsizligiga ta‘sir qilishining oldini olish maqsadida fuqarolarni boshqa manzillarga ko‘chirishga qaror qilingan.

Hozirda  ushbu xonadonlarda yashovchi 104 nafar fuqarodan 41 nafari, ya’ni 15 ta oila boshqa manzillarda istiqomat qiluvchi yaqinlarining xonadonlariga ko‘chib o‘tmoqda. 17 ta xonadonda yashovchi 63 nafar fuqaro esa vaqtincha turar joy bilan ta’minlandi. 

Ayni paytda mutasaddilar tomonidan ushbu uy aholisini turar joy bilan ta’minlash masalasi ko‘rib chiqilmoqda.