Қашқадарё вилоятининг Қарши шаҳрида фуқарога субсидия асосида уй олиб беришини айтиб, ундан 2700 доллар талаб қилган солиқчи фуқародан сўралган пулнинг 700 долларини олаётганда қўлга тушди.
Мазкур ҳолат ДХХнинг вилоят бошқармаси ва ҳуқуқни муҳофаза қилувчи органлар ҳамкорлигида ўтказилган тезкор тадбирда фош этилган.
Маълум бўлишича, Қарши шаҳар Солиқ инспекциясида бўлим бошлиғи сифатида фаолият юритиб келган А.Д. мурожаатчи фуқарога Вазирлар Маҳкамасининг 2022 йил 14-октябрдаги “Аҳолига ипотека кредити ва уй-жой сотиб олиш учун субсидия ажратиш жараёнларини соддалаштириш чора-тадбирлари тўғрисида”ги қарорига асосан субсидия ажратиб, уй-жой олишида кўмаклашишини айтган. Ва бунинг эвазига ундан 2700 доллар талаб қилган.
Солиқ инспекцияси ходими фуқародан бу иш учун 2023 йилнинг март ойида 1500 доллар олиб, қолган 1200 долларини ҳам талаб қила бошлаган. Ҳамда сўралган пулнинг 700 долларини олаётганда ДХХ ва ҳамкор ташкилотлар томонидан ташкил этилган тезкор тадбирда қўлга тушган.
Ҳолат юзасидан собиқ солиқчига нисбатан Жиноят кодексининг 168-моддаси 3-қисми “в” банди ва 28,211-моддасининг 1-қисми билан жиноят иши қўзғатилган. Тергов ҳаракатлари олиб борилмоқда.
Изоҳ (0)