Xorazm viloyati Xonqa tumanida yashovchi fuqaroni do‘pposlagan departament xodimlariga chora ko‘rilmagani aytildi. Viloyat prokuraturasi ushbu xabar yuzasidan ma’lumotlarni taqdim etdi.
Xabarga ko‘ra, viloyat prokuraturasi tomonidan ijtimoiy tarmoqlar orqali Xonqa tumanida yashovchi fuqaroning ushbu shikoyati o‘rganildi. Aniqlanishicha, departamentning Xorazm viloyat boshqarmasi tomonidan 25-fevralda fuqaro X.Shamaqovga nisbatan Jinoyat kodeksining 168-moddasi 1-qismi va 28,211-moddasi 1-qismi bilan jinoyat ishi qo‘zg‘atilgan.
Jinoyat ishi qo‘zg‘atilishiga departament va DXX xodimlari tomonidan fuqaro M.Qilichevaning arizasi yuzasidan 23-fevralda o‘tkazilgan tezkor tadbirda Sh.X. ariza muallifini va uning qizini Urganch shahridagi tibbiyot birlashmalarining biriga yuqori lavozimlarda ishlovchi tanishlari orqali ishga kiritib berish evaziga 1500 dollar talab qilib, shundan 1400 dollar va 1 million so‘m olgani yuzasidan to‘plangan hujjatlar asos bo‘lgan.
Jinoyat ishi bo‘yicha tergov harakatlari olib borilib, 15-mayda X.Shamaqovga Jinoyat kodeksining 168-moddasi 1-qismi, 28,211-moddasi 1-qismi, 219-moddasi 2-qismi, 109-moddasi 2-qismi bilan ayblov eʼlon qilinib, garov ehtiyot chorasi qo‘llangan.
Shuningdek, X.Shamaqov hamda uning himoyachisiga dastlabki tergov tamomlangani eʼlon qilingan va ular jinoyat ishi hujjatlari bilan tanishtirilgan.
X.Shamaqov departament va DXX xodimlari uni ushlab, urib tan-jarohatlari yetkazgani haqidagi ko‘rsatmalari bo‘yicha tergov harkatlari olib borilib, uning ko‘rsatmalari o‘z tasdig‘ini topmagani sababli ishning DXX va departament xodimlariga nisbatan bo‘lgan qismi Jinoyat protsessual kodeksining 83-moddasi 2-bandiga asosan tugatilgan.
Jinoyat ishi ayblov xulosasi bilan 16-may kuni Xorazm viloyat sudiga yuborilgan.
Izoh (0)