Shavkat Mirziyoyev 28-may kuni telefon orqali muloqotda Turkiya prezidenti Rajab Toyyib Erdo‘g‘onni prezidentlik saylovida erishgan g‘alabasi bilan tabrikladi. Bu haqda Prezident matbuot xizmati xabar berdi.
Unga ko‘ra, saylovning ikkinchi turida saylovchilar ishtirokining yuqori darajasi va ovoz berish natijalari qardosh Turkiya xalqi amaldagi davlat rahbarining siyosati va islohotlar dasturini qo‘llab-quvvatlayotganining ishonchli ifodasi ekani qayd etildi.
Suhbatda O‘zbekiston bilan Turkiya o‘rtasidagi strategik sheriklik munosabatlarini yanada mustahkamlash va hamkorlikni kengaytirishning dolzarb masalalari ham ko‘rib chiqildi. Oliy darajadagi kengashning navbatdagi yig‘ilishi kun tartibini tayyorlash maqsadida barcha darajalarda faol muloqotlarni davom ettirishga kelishib olindi.
Davlat rahbarlari xalqaro siyosat va mintaqaviy hamkorlik masalalari yuzasidan ham fikr almashdi.