Toshkent viloyati Yuqori Chirchiq tumanida erkak sigir sabab o‘z tanishini pichoqlab o‘ldirdi. Bu haqda “Millar” dasturida xabar berildi.
Holat 22-may kuni sodir bo‘lgan. Yuqori Chirchiq tumanining “Istiqlol” mahallasida yashovchi, 2-guruh nogironi bo‘lgan erkakni boshqa bir mahallada yashovchi fuqaro pichoqlab o‘ldirgan. Jinoyatni sodir etgan erkak 1990-yilda tug‘ilgan bo‘lib, marhum bilan qo‘shni mahallada yashagan.
Hodisaga guvoh bo‘lib qolgan marhumning qizi voqea sabablarini aytib berdi. Unga ko‘ra, holatga sigir sabab bo‘lgan.
“Sigirimiz yechilib ketgan edi. Otam olib kelamiz, deb meni chaqirdi. Keyin otamni pichoqlagan odam keldi. Bizga sigirni qayerdan o‘g‘irlab kelyapsiz, dedi. Bizniki ekanligini aytganimizda biz bilan tortishib ketdi. U masjidga tegishli sigir deb o‘ylagan ekan. Uni haydadim, keting, dedim. Pichoq tiqqanidan keyin yugurib kelib 102 ga telefon qildim. Qaytsam, dadam yerda qonga belanib yotgan ekan. Akamga ham pichoq tiradi u kishi”, — deydi qiz.
Hozirda holat yuzasidan Yuqori Chirchiq tumani prokuraturasi tomonidan Jinoyat kodeksining 97-moddasi bilan jinoyat ishi qo‘zg‘atilgan.
Izoh (0)