Ukraina harbiylari yoki razvedka xizmatlari may oyi boshida Kremlga qilingan dron hujumiga aloqador bo‘lishi mumkin, deb hisoblaydi AQSH razvedkasi. Bu haqda The New York Times (NYT) ismini oshkor etmagan amerikalik rasmiylarga tayanib xabar berdi.
AQSH razvedkasi Ukraina va Rossiya tomonining tutib olingan xabarlar to‘lqini asosida shunday xulosaga kelgan. NYT manbalariga ko‘ra, hujumda Ukraina maxsus xizmatlarining ishtiroki haqida aniq dalillar yo‘q.
AQSH razvedkasi hujum ortida kim turgani, Ukraina prezidenti Vladimir Zelenskiy va boshqa ukrainalik amaldorlar hujumdan xabardor bo‘lgan-bo‘lmagani haqida aniq ayta olmaydi. Amerikalik rasmiylarning fikricha, dron hujumi Ukraina nazoratisiz amalga oshirilayotgan va AQSHni bezovta qilayotgan qator operatsiyalarning bir qismi bo‘lishi mumkin.
3-may kuni Kremlga uchuvchisiz uchoqlardan hujum qilingani aks etgan video tarqaldi. Hodisada hech kim jabrlanmadi, binoga jiddiy zarar yetmadi. Rossiya hukumati buni terrorchilik harakati va Rossiya prezidentining hayotiga suiqasd sifatida baholadi. Ukraina rasmiylari bunga aloqadorligini rad etmoqda.
Rossiya prezidenti matbuot kotibi Dmitriy Peskov Kremlga uchirilgan dronlar hujumi ortida AQSH turganini aytdi. Oq uy esa hujumga aloqadorlik bo‘yicha Rossiya ayblovlarini “be’mani” deb baholadi.
Izoh (0)