Rossiya prezidenti matbuot kotibi Dmitriy Peskov Kremlga uchirilgan dronlar hujumi ortida AQSH turganini aytdi. Bu haqda “Vedomosti” xabar berdi.
Peskovning so‘zlariga ko‘ra, Kiyev rejimining xatti-harakatlari Vashington tomonidan buyruq asosida bajariladi va Moskva buni yaxshi biladi. U Rossiya tomonida mavjud bo‘lgan ma’lumotlar dronlar Ukraina tomonidan uchirilganidan dalolat berishini aytdi.
“Kiyevda ham, Vashingtonda ham buni rad etishga urinishlar kuzatilayotgani, albatta, bema’nilik. Biz yaxshi bilamizki, bunday harakatlar, ’teraktlar’ bo‘yicha qarorlar Kiyevda emas, Vashingtonda qabul qilinadi. Kiyev esa berilgan topshiriqni bajarmoqda.
Aslida, tegishli maqsadlarni ko‘pincha Kiyevning o‘zi emas, balki Vashington belgilab beradi, keyin esa buni Ukraina amalga oshirishga olib keladi. Har safar ham Kiyevga tanlov huquq berilmaydi. Bu ko‘pincha okeanning narigi tomonida diktovka qilinadi. Biz buni yaxshi bilamiz va bundan xabardormiz”, — dedi Peskov.
Putinning matbuot kotibi Kremlga hujum ortida Vashington turganiga ishonishini ikki marta ta’kidladi. U Vashington mojaroda bevosita ishtirok etishi qanchalik xavfli ekanini tushunishi kerakligini qo‘shimcha qildi.
Kremlga dronlar hujumi sinchkovlik bilan tekshirilmoqda, hozir bu bilan Rossiya Tergov qo‘mitasi va maxsus xizmatlar shug‘ullanmoqda, biroq Peskov tergov natijalari qachon bo‘lishini aytish qiyinligini bildirdi.
Putinning ushbu mavzu bo‘yicha alohida chiqishi, shuningdek, Xavfsizlik kengashi yig‘ilishi o‘tkazishi rejalashtirilmagan. Biroq, odatdagidek, 5-may kuni Xavfsizlik kengashining doimiy a’zolari bilan tezkor yig‘ilishda bu mavzu ko‘tarilishi mumkin.
Peskov dronlarning hujumiga qanday javob bo‘lishi mumkinligi haqidagi savolga “xilma-xil” deb javob berdi va aniqlik kiritmadi.
“Har qanday holatda ham, biz faqat o‘ylangan, mamlakatimiz manfaatlariga mos keladigan muvozanatli qadamlar haqida gapirishimiz mumkin”, — dedi u.
Shuningdek, Peskov dronlarning qayerdan uchirilgani tafsilotlarini oshkor qilmagan va bularning barchasiga o‘z vaqtida maxsus xizmatlar oydinlik kiritishini ta’kidlagan.
“Bu qanday sodir bo‘lgani mutaxassislarimiz uchun chuqur tahlil qilinadigan mavzu. Ular o‘z vazifalarini bajaradi”, — dedi Peskov.
Uning so‘zlariga ko‘ra, Kremlda xavfsizlik choralari allaqachon kuchaytirilgan.
AQSH ayblovlarni rad etdi
Oq uy hujumga aloqadorlik bo‘yicha Rossiya ayblovlarini “be’mani” deb baholadi. AQSH Milliy xavfsizlik kengashining strategik aloqalar bo‘yicha koordinatori Jon Kirbi tomonidan tegishli bayonot e’lon qilindi, deydi CNN.
AQSH Davlat kotibi Entoni Blinken Kreml xabarining to‘g‘riligiga shubha bildirib, Oq uy Ukrainani Rossiya hududiga zarba berishga undamayotganini ta’kidladi.
Putin qarorgohiga hujum: Nimalar ma’lum?
3-may kuni Kremlga ikkita dron zarba berishga uringani haqida xabar berildi.
“Harbiy va maxsus xizmatlar tomonidan radar jangovar tizimlaridan foydalangan holda o‘z vaqtida ko‘rilgan choralar natijasida dronlar ishdan chiqarildi”, — deyiladi xabarda.
Rossiya tomoni bu harakatlarni 9-may parad arafasida amalga oshirilgan terrorchilik harakati va prezidentga suiqasd sifatida baholadi. Biroq Putin hujum payti Kremlda bo‘lmagani qayd etildi.
Internetda hujum aks etgan videolar ham paydo bo‘ldi. Birinchi dron prezidentning Kreml qarorgohi joylashgan Senat saroyi ustida portlagan, shundan so‘ng bino gumbazi qismi yonib ketgan. Ikkinchi dronning qoldiqlari Kreml hududiga tushgan.
Rossiya Tergov qo‘mitasi terrorchilik harakati (Rossiya Federatsiyasi Jinoyat kodeksining 205-moddasi) bo‘yicha jinoiy ish qo‘zg‘atgan.
Ukraina rasmiylari va prezident Zelenskiy hujumga aloqadorlikni rad etdi
Zelenskiyning so‘zlariga ko‘ra, Ukraina o‘z hududida jang olib bormoqda va hududini Rossiyadan himoya qilmoqda.
“Biz Putinga yoki Moskvaga ham hujum qilmaymiz. O‘z zaminimizda jang qilamiz, qishloq va shaharlarimizni muhofaza qilamiz. Buning uchun ham qurolimiz yetarli emas. Shuning uchun qurollardan boshqa maqsadlarda foydalanmaymiz”, — degan u.
“Bizda Kremlga tungi hujumlar haqida hech qanday ma’lumot yo‘q. Ammo, prezident Zelenskiy bir necha bor ta’kidlaganidek, Ukraina barcha mavjud kuch va vositalarni o‘z hududlarini ozod qilishga, boshqalarga hujum qilmaslikka yo‘naltiradi.
Terroristik davlat so‘zlari hayratlanarli. Terakt bu Dnepr va Umandagi kirish yo‘llari yoki Kramatorskdagi temiryo‘l vokzalidagi raketa otishmasi va boshqa ko‘plab fojialar oqibatida vayron bo‘lgan uylardir. Moskvada sodir bo‘lgan voqea, shubhasiz, 9-maygacha vaziyatning keskinlashuvi”, — deydi Zelenskiyning matbuot kotibi.
Izoh (0)