Rossiya prezidenti Vladimir Putin Kremlga 3-may kuni uchirilgan dronlarga qanday munosabat bildirgani ma’lum qilindi. Prezident matbuot kotibi Dmitriy Peskov bu haqda ma’lumot berdi.
Peskov Putining munosabati haqida gapirar ekan, Rossiya rahbari og‘ir, ekstremal vaziyatlarda o‘zini xotirjam tutib, aniq buyruq berishini bildirdi.
“Bunday og‘ir, ekstremal vaziyatlarda prezident har doim xotirjam bo‘lib qoladi, bergan buyruqlarida aniqlik aks etadi, shuning uchun bu borada hech qanday yangilik yuz bergani yo‘q”, — dedi Peskov.
Shuningdek, u Rossiya Xavfsizlik kengashi raisi o‘rinbosari Dmitriy Medvedevning Ukraina rahbarini o‘ldirishdan boshqa variant qolmagani haqidagi bayonotiga izoh berishdan bosh tortdi. Ammo Peskov Kremlga dronlar hujumi tufayli Ukrainadagi “maxsus operatsiya” maqsadi va sur’ati o‘zgarmasligini qayd etdi.
Putinning ish grafigiga ko‘ra, u 4-may kuni Kremlda ishlaydi va u yerda iqtisodiy rivojlanish vaziri Maksim Reshetnikov bilan uchrashadi. Putin dron hujumi yuzasidan xalqaro aloqalarni rejalashtirmayapti, dedi Peskov. Navbatdagi xalqaro muzokaralar Qirg‘iziston prezidenti Sadir Japarovning 8-may kuni bo‘lib o‘tadigan amaliy tashrifidir.
Putin qarorgohiga hujum
Ukraina 3-mayga o‘tar kechasi Rossiya prezidentining qarorgohiga dronlar bilan zarba berishga uringani haqida xabar berildi. Ikkita dron Kremlni nishonga olishga qaratilgani, harbiylar va maxsus xizmatlarning o‘z vaqtida ko‘rgan сhoralari natijasida qurilmalar ishdan chiqarilgani ta’kidlandi.
Hujum oqibatida Putin jabrlanmagani ma’lum qilindi, Rossiya prezidenti hodisa paytida Kremlda bo‘lmagan. Holat yuzasidan Moskvada 3-maydan boshlab dronlar uchirish taqiqlandi, 9-may paradi o‘tkazilishi rejasi esa davom etadi.
Zelenskiy Kremlga uchirilgan dronlarga qanday munosabat bildirdi?
Zelenskiyning so‘zlariga ko‘ra, Ukraina o‘z hududida jang olib bormoqda va hududini Rossiyadan himoya qilmoqda.
“Biz Putinga yoki Moskvaga ham hujum qilmaymiz. O‘z zaminimizda jang qilamiz, qishloq va shaharlarimizni muhofaza qilamiz. Buning uchun ham qurolimiz yetarli emas. Shuning uchun qurollardan boshqa maqsadlarda foydalanmaymiz”, — degan u.
Izoh (0)