“Barselona” himoyachisi Xordi Alba 11 yillik faoliyatidan keyin jamoani tark etadi. Bu haqda Mundo Deportivo xabar berdi.
Xabarga ko‘ra, ispaniyalik futbolchi “Barselona” bilan shartnomasi 2024-yilning yozigacha tuzilganiga qaramay, 2022/23-yilgi mavsum so‘ngida jamoani tark etadi. Xordi Alba 24-may kuni Kataloniya klubini tark etishini e’lon qiladi.
“Barselona”ning 28-may, yakshanba kuni “Kamp Nou”da bo‘lib o‘tadigan “Malyorka”ga qarshi o‘yinida Alba ham xuddi Serxio Buskets kabi muxlislar bilan xayrlashadi.
Alba “Barselona”da 2012-yildan beri to‘p surib kelmoqda. Futbolchi klub bilan 6 marta La Liga, 5 marta Ispaniya Kubogi, 4 marta Ispaniya Superkubogini qo‘lga kiritgan. U jamoa safida Chempionlar Ligasi, Yevropa Superkubogi va Klublar o‘rtasidagi Jahon chempionatida ham g‘olib chiqqan.
Bir necha kun avval futbolchiga Milanning “Inter”idan qiziqish borligi va “Barselona” Albaning ketishiga qarshilik ko‘rsatmasligi xabar qilingandi.
34 yoshli futbolchi joriy mavsum La Ligada 22 ta o‘yin o‘tkazib, 2 ta gol va 3 ta golli uzatmaga mualliflik qildi.
Avvalroq “Barselona” yarim himoyachisi Serxio Buskets 15 yillik faoliyatidan keyin jamoani tark etishi haqida xabar berilgandi.
Izoh (0)