“Real Madrid” futbolchisi Vinisius Junior atrofidagi irqchilik bilan bog‘liq mojarolar davom etmoqda. Braziliya hukumati holat yuzasidan Ispaniyaga shikoyat bilan chiqdi, Ispaniya futbol federatsiyasi Vinisiusga ko‘rsatilgan qizil kartochkani bekor qildi, “Valensiya” jarimaga tortildi. “Daryo” futbolchi atrofidagi voqealarning davomi haqida ma’lumot beradi.
Birinchi qism:
“Buyuk futbolchilar o‘ynagan liga bugun irqchilarga tegishli!”. “Valensiya” muxlislari Vinisiusni “portlash”ga majbur qildi — u yig‘ladi, chetlatildi va ijtimoiy tarmoqda javob qildi (video)
Ikkinchi qism:
“Vinisius ishi” davom etadi. VAR hakamlari chetlatildi, “Real” prokuraturaga arz qildi.
Braziliya hukumati Ispaniyaga shikoyat bilan chiqdi, Vinisiusning qizil kartochkasi bekor qilindi, “Valensiya” esa jarimaga tortildi
Vinisius Juniorga nisbatan qilingan irqchilik va haqoratlar uning vatani Braziliyada norozilikka sabab bo‘ldi. Mamlakat hukumati Ispaniyaga rasmiy shikoyat bilan chiqdi. Braziliya Tashqi ishlar vazirligining bayonotida FIFA, Ispaniya futbol federatsiyasi va La Ligaga ham murojaat qilingan.
Braziliya hukumati bunday irqchilik harakatlarining oldi olinishi va takrorlanmasligi uchun hozirgacha samarali choralar ko‘rilmaganidan chuqur afsusda. Ispaniya hukumati va sport organlarini aybdorlarni jazolash va bunday xatti-harakatlarning takrorlanishining oldini olish uchun zarur choralarni ko‘rishga chaqiramiz. Shuningdek, FIFA, Ispaniya futbol federatsiyasi va La Ligani tegishli choralar ko‘rishga chorlaymiz, — deyiladi Braziliya hukumati bayonotida.
“Valensiya” — “Real” uchrashuvida Vinisius Juniorga ko‘rsatilgan qizil kartochka bekor qilindi. Ispaniya futbol federatsiyasining sport musobaqalari qo‘mitasi uzoq muhokamalaridan keyin futbolchining diskvalifikatsiyasini olib tashlash qaroriga kelgan. Bunga bosh hakamda vaziyatni va futbolchining bu harakatiga sabab bo‘lgan avvalgi holatlar bo‘yicha ma’lumotlar yetarli bo‘lmagani sabab qilib ko‘rsatilgan.
Shunday qilib braziliyalik o‘yinchi “Real Madrid”ning 24-may kuni bo‘lib o‘tadigan “Rayo Valyekano”ga qarshi o‘yinida maydonga tushishi mumkin bo‘ladi.
“Valensiya” jamoasi uy o‘yinlarini o‘tkazadigan “Mestalya” stadioni Vinisius Juniorga qilingan irqchilik tufayli qisman yopiladi.
Ispaniya futbol federatsiyasining sport musobaqalari qo‘mitasi La Liganing 35-turi doirasidan o‘rin olgan o‘yinda “Real” hujumchisiga nisbatan irqchilik ruhidagi haqoratlarni amalga oshirgan muxlislar o‘tirgan “Mario Kempes” tribunasini beshta o‘yinga yopishga qaror qildi.
Shuningdek, “Valensiya” 45 ming yevro miqdorida jarimaga tortildi. Klub 10 ish kuni ichida apellyatsiya berishi mumkin.
Ispaniya politsiyasi Vinisius Juniorni haqorat qilgan uch nafar yosh muxlisni hibsga olganini e’lon qildi. Avvalroq “Valensiya” braziliyalik futbolchini haqorat qilgan ishqibozlarni bir umrga futboldan chetlashtirishini ma’lum qilgandi.
Braziliyada Vinisiusga bag‘ishlangan aksiya bo‘lib o‘tdi, “Barselona” vakili Rafinya futbolchini qo‘llab-quvvatladi, Xavi esa uning qizil kartochkasi bekor qilinganini tanqid qildi
Braziliyada Vinisius Juniorga bag‘ishlangan aksiya bo‘lib o‘tdi. Rio-de-Janeyro shahrida joylashgan Iso Masih haykali chirog‘i futbolchi bilan birdamlik ramzi sifatida o‘chirildi. Aksiya tashkilotchilari haykal chirog‘ining o‘chirilishini “irqchilikka qarshi ommaviy kurash ramzi hamda futbolchi va butun dunyo bo‘ylab bundan aziyat chekayotganlar bilan birdamlik belgisi” deb atadi.
“Barselona”ning braziliyalik futbolchisi Rafinya vatandoshi Vinisius Juniorni qo‘llab-quvvatladi. Kataloniya klubining “Valyadolid”ga qarshi bahsida (1:3) Rafinya 62-daqiqada zaxiraga olinayotgan vaqtda libosini yechdi. Uning ichki futbolkasida “Ko‘zning yorqinligidan ko‘ra terining rangi muhimroq ekan, urush bo‘laveradi”, degan yozuv bor edi. Orqa tomoniga esa “Biz sen bilanmiz, Vini”, deb yozilgandi.
“Barselona” murabbiyi Xavi ham irqchilik va haqoratlarni qoraladi, biroq Vinisiusga ko‘rsatilgan qizil kartochka bekor qilinganini tanqid qildi.
“Irqchilik va haqorat xatti-harakatlari jazolanishi kerak, ammo qizil kartochkaning bunga aloqasi yo‘q. Vinisius tomonidan qilingan harakat maydonda sodir bo'ldi”, — dedi ispaniyalik mutaxassis.
Izoh (0)